FRANTZIAKO GOBERNUAREN OSAKETA

Kritikoek ez dute gobernuan jarraituko

Ekonomia, Hezkuntza eta Kultura ministroak aldatu ditu Vallsek. Gobernu parekidea osatu du. Ezkerreko Alderdi Erradikalak gobernuan jarraituko du.

Manuel Valls Frantziako lehen ministroa.
Manuel Valls Frantziako lehen ministroa. / Etienne Laurent/EFE

Berria.eus -

2014ko abuztuak 26

Manuel Valls Frantziako lehen ministroak gobernu osoaren dimisoa aurkeztu eta gero, gaur arratsaldean jakinarazi dute nortzuek osatuko duten gobernu berria.

Iragarrita zegoen bezala, gobernuan ez dute segituko Eliseoak hartutako neurri ekonomikoekin kritiko agertu diren hiru ministroak: Arnaud Montebourg Ekonomia ministroak, Benoit Hamon Hezkuntza ministroak eta Aurelie Fillipetti Kultura ministroak. Haien ordezkoak izango dira, hurrenez hurren, Emmanuel Macron, Najat Vallaud-Belkacem eta Fleur Pellerin.

Aldiz, gobernuan segituko dute  Laurent Fabius (Naziorateko Harremanak), Ségolène Royal (Ekologia), Christiane Taubira (Justizia) Michel Sapin (Finantzak), Jean-Yves Le Drian (Defentsa), François Rebsamen (Lana) , Stéphane Le Foll (Nekazaritza eta bozeramilearen bulegoa), Bernard Cazeneuve (Herrizaingoa), Marylise Lebranchu (Deszentralizazioa eta Funtzio Publikoa) eta George-Pau Langevin (Atzerria).

Era berean, Gazte eta Kirol ministerioa sortzea adostu dute; Patrick Kannerrek gidatuko du.

Gobernu parekidea izango da Vallsena: zortzina emakume eta gizonezkok osatuko dute.

Arratsaldean zehar gobernua osatzeko bilerak egin ditu Vallsek. Aurrena, PRG Ezkerreko Alderdi Erradikalaren buru Jean Michel Bayletekin bildu da Matignonen —gobernuan jarraituko dute erradikalek—. Ondoren batzartu da François Hollande Frantziako presidentearekin, eta bilera horren ostean eman dute ezagutzera talde berria.

Filipettiren “mezua”

Aurelie Fillipetti Kultura ministroak gobernuan ez jarraitzea argudiatu du, talde berria babestuko duela zehaztearekin batera. BFM TV telebistan eginiko elkarrizketa batean, Fillipettik azaldu du ez duela "politikaren errotiko aldaketa bat" eskatzen, "frantziarrei mezu bat igortzea baizik". Mezu hori "esfortzuaren banaketa ezberdinaren" ingurukoa da, adierazi duenez.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna