MUNDUA

Gerra krimenak egitea egotzi die NBEk Estatu Islamikoari eta Siriako Gobernuari

Eraso kimikoak egitea eta exekuzioak "ohiko ikuskizun" bilakatzea egotzi die Nazio Batuen Erakundeak Al-Assaden gobernuari eta Estatu Islamikoari.

Siriako armadako soldadu bat, Damaskon.
Siriako armadako soldadu bat, Damaskon. Youssef Badawi / EFE

Berria -

2014ko abuztuak 27

Nazio Batuen Erakundeko ikerlari talde batek eginiko txosten batean salatu dituzte Siriako Gobernua eta Estatu Islamikoa. Baxar al-Assaden gobernuari dagokionez, zibilak bizi diren guneetan substantzia kimikoak zituzten bonba-upelak jaurtitzea egotzi diote. Apirilekoak dira NBEk salatutako erasoak, eta uste dute kloroa sartu zutela upeletan.

Gainera, Siriako Gobernuaren mende dauden espetxeetan preso ugari hil dituztela salatu du NBEk. 2011 eta 2013 arteko 27.000 argazki aztertu dituzte, eta frogatutzat jo dute "tortura sistematikoak" egiten dizkietela eta preso ugari hil direla.

Estatu Islamikoari, berriz, jendaurrean anputazioak eta exekuzioak eginez Siria iparraldean beldurra zabaltzea aurpegiratu dio NBEk. Ondoren, hiru egunez hildakoen gorpuak erakusten dituztela azaldu dute ikertzaileek. Paulo Pinheiro ikerketa batzordearen buruak nabarmendu du milizia "arrisku argia" dela zibilentzat, bereziki gutxiengoentzat.

Siriako gatazka hasi zenetik egin duten zortzigarren ikerketa batzordea da, eta Genevan (Suitza) aurkeztu dituzte txostenaren ondorioak.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna