ESKOZIAKO PROZESU SUBIRANISTA

Compston aktorearen erantzuna

Astelehenan, 2.000 lagun bildu ziren Londresen Eskoziak Erresuma Batuan jarraitzearen alde. Martin Compston aktoreak egin zuen mobilizazio hari erantzuteko deia.

Martxelo Otamendi -

2014ko irailak 17

Bide guztiek balio dute Eskoziaren erreferenduma irabazteko, alde edo aurka, baina irabazteko. Astelehenean, 2.000 lagun bildu ziren Londresek daukan gunerik turistikoenetako batean, Trafalgar Squaren, eskoziarrei eskatzeko ezezkoaren alde egin dezatela.

Ezohikoa izan zen deialdia, ez zuelako erakunde politiko edo sozial batek egin, telebista ekoizle batek baizik. Egoeraren larria ikusita, Dan Snow telebista produktoreak Trafalgar Squaren biltzera deitu zituen londrestarrak, eskoziarrei ikustarazteko zein garrantzitsua den bihar, osteguna, ezezkoa bozkatzea. Snowren deiari erantzunez, 2.000 lagun bildu ziren, Bob Geldof kantari irlandarra, Eddie Izzard eta Al Murray aktoreak tartean. Porrot handia milioka biztanle dituen Londresen, city-an bizi direnei Eskozian gertatzen ari dena oso gutxi axola zaien erakusgarri.

Snowren deialdiarekin haserre, eta erantzuteko asmoarekin, beste horrenbeste egin zuen atzo, asteartea, Martin Comspton aktore eskoziarrak. Glasgowko herritarrak biltzera deitu zituen arratsaldeko seietan, George plaza zentrikoan, independentziaren alde egin zezaten. Trafalgarren astelehenean bezala, 2.000 lagun inguru bildu zituen Compston gazteak. Baina Glasgown, inguru osoa hartuta, 600.000 lagun bizi dira.

Jendea bildutakoan, eskuko bozgorailua hartu, eta, hamabost minutuko mintzaldian, independentziaren abantailak azaldu zizkien bildutakoei Compstonek. Eskoziako banderak eskutan hartuta, jai giroan eta independentziaren aukerak irabaziko duela konbentzituta, txalo zaparradarekin erantzuten zioten zuzendaririk gabe, makillaje gabe eta gidoi ikasirik gabe jardun zuen aktore ezagunari.

Martin Compston eskoziarra da, 30 urte dauzka, eta BBCk ekoitzitako hainbat serietan jokatu du. Ken Loachek zuzendutako Sweet Sixteen filmeko aktore nagusia izan zen.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna