Siria

Estatu Islamikoaren kontrako "borroka" luzea izango dela iragarri du Obamak

Bart hasi da AEB Siria bonbardatzen. Operazioan Ekialde Hurbileko beste hainbat herrialderen sostengua jaso du.

AEBetako armadaren itsasontzi bat misil bat jaurtitzen, bart. /
AEBetako armadaren itsasontzi bat misil bat jaurtitzen, bart. / US NAVY/EFE

Berria -

2014ko irailak 23

"Talde terrorista hau akabatzeko egin beharreko guztia egingo dugu". Modu horretan mintzatu da Barack Obama AEBetako presidentea gaur Estatu Islamikoaren kontra abiatutako erasoen harira. Bart hasi da EIren zenbait gune bonbardatzen, beste herrialde batzuekin batera. Aitortu du luze joko duela eta zaila izango dela.

Erasoaren berri AEBetako Defentsa Departamentuko eledun John Kirbyk eman du. "AEBetako eta herrialde aliatuetako indarrek hasi dituzte Estatu Islamikoaren aurkako erasoak Sirian, bonbardariak eta Tomahawk misilak erabiliz", adierazi du. Eraso horien ondorioz, jomuga ziren guneak hutsik geratu dira, albiste agentzien arabera. Horien arabera, 70 hildako eta 300 zauritu eragin dituzte Estatu Islamikoaren indarren artean.

Washingtonek ez du xehetasun gehiagorik eman goizean, baina beste zenbait iturrik aurreratu dute Ekialde Hurbileko hainbat estaturen babesa jaso duela operazioak, besteak beste, Jordaniarena, Qatarrena edota Bareinena. Azken horrek baieztatu du parte hartu duela. Erresuma Batuko lehen ministro David Cameronek babesa agertu die erasotzaileei, eta ez du baztertu parte hartzea.

50 gune bonbardatu dituzte

Oraingoz, Washingtonen arabera, miliziek Al Raqqan eta Deir al Zur eskualdeetan dituzten gotorlekuak ari dira bonbardatzen. Orotara, 50 gune bonbardatu dituzte. Aldiz, lekukoen arabera, eskualdeko gobernadorearen egoitza eta erietxe bat ere suntsitu dituzte.

Barack Obama presidenteak aurretik nabarmendu du operazio honek ez duela zerikusirik Afganistan eta Irakeko gatazkekin, izan ere, AEBek ez dituzte lurreko tropak bidaliko. Pentagonoan, ordea, hasiak dira entzuten ahots kritikoak, askok uste baitute ez dela posible miliziak garaitzea lurreko tropak erabili gabe.

Dena den, zenbait iturriren arabera, AEBetako presidenteak baimena eskatu dio Kongresuari Siriako gerrillariak trebatu eta armatzeko, Estatu Islamikoaren aurka egin dezaten. Ukatu egin dute, ordea, Siriako presidentearekin ezer adostu dutenik.

Sirian ez ezik, Iraken ere bonbardaketak egiten hasia da Washington, Estatu Islamikoa desegiteko argudioarekin. Han, 190 gune bonbardatu dituzte abuztuaz geroztik.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna