KATALUNIAKO PROZESU SUBIRANISTA

Litekeena da Konstituzionalak gaur uztea bertan behera galdeketa, behin-behinean

Helegitea aurkeztu du Espainiako Gobernuak. Antidemokratikotzat jo du Rajoyk. Masek azaldu du Kataluniako alderdiekin adostuko duela balizko debekuari nola erantzun.

Mariano Rajoy, Ministroen Kontseilu osteko adierazpen instituzionalean.
Mariano Rajoy, Ministroen Kontseilu osteko adierazpen instituzionalean. Ballesteros / EFE

Jon Olano - Jon Ordoñez -

2014ko irailak 29

Espainiako Auzitegi Konstituzionalak ezohiko bilera egingo du gaur arratsaldeko zazpietan. Espainiako Gobernuak goizean aurkeztu duen helegitea tramitera onartuz gero, une horretan bertan geratuko da bertan behera Artur Masek larunbatean galdeketara deitzeko sinatu zuen dekretua, baita Kontsulta Legea bera ere, behin-behinean. Ordu berean agerraldia du Masek, Kataluniako Trantsizio Nazionalaren Liburu Zuria aurkezteko.

Espainiako Ministroen Kontseilua 10:00etan bildu da, Mariano Rajoy presidentea buru duela, aurkeztu beharreko helegiteak adosteko. Onartu egin dituzte helegiteak, eta adierazpen instituzional bat egin du Rajoyk. Galdeketaren legezkotasuna izan du hizpide, batez ere. Haren esanetan, kontsulta "ez da bateragarria Espainiako Konstituzioarekin", eta arau horren kontrako "erasotzat" jo du ekimena.

Antidemokratikotzat jo du Rajoyk

Rajoyk gogorarazi du Espainiako Konstituzioaren arabera subiranotasuna "Espainiako herri osoarena" dela eta "zati batek" ezin duela erabaki espainiar guztiei eragiten dienari buruz. Hori horrela, galdeketa "antidemokratikotzat" jo du: "Ez dago inor subiranotasun printzipioa hauts dezakeenik".

Gainera, Kataluniako Gobernuak izandako jarrera kritikatu du: "Aldebakarreko erabakiak hartu dira, gainontzekoek besterik gabe onartzea nahi izanda". Zentzu horretan, Artur Masi "lege barruan elkarrizketa osoa" eskaini dio, baina "batere ez lege kanpoan".

Espainiako Estatu Kontseiluak atzo babesa eman zion Espainiako Gobernuak Kataluniako Kontsulten Legearen eta galdeketara deitzeko dekretuaren kontra helegiteak aurkezteari. Espainiako Gobernuak eskatu zion kontseiluari iritzia larunbatean, eta bi eguneko epea eman zion erantzuteko.

Artur Masi elkarrizketa

Larunbatean onartu zuen Artur Mas Kataluniako Gobernuko presidenteak independentziari buruzko galdeketara deitzeko dekretua. La Sexta Espainiako telebista katean elkarrizketa egin diote; azaldu duenez, Espainiako Auzitegi Konstituzionalak galdeketa bertan behera uzten badu gainerako alderdiekin adostuko du debekuari nola erantzun.

Desobedientziaren bidea baztertu du, baina eskatu du "ez gaitzesteko" desobedientzia zibila, argudiatuz hari esker lortu izan direla eskubide ugari. Halaber, Madrili ohartarazi dio Katalunian "arazo bat" duela, eta Kataluniako Gobernuak deitutako galdeketa legez kanpokoa bada, eskatu dio Espainiako Gobernuak berak antola dezala galdeketa bat kataluniarren iritzia jakiteko.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna