Ebolaren kontrako prestakuntza indartuko du Osakidetzak

 

Berria -

2014ko urriak 7

Osakidetzak eman du emakumeari eginiko azterketaren emaitzen berri. Basurtuko unibertsitate ospitalean eta Madrilgo Carlos III. Institutuaren laborategian egindako frogek baztertu egin dute pazientea ebolaren birusarekin kutsatuta dagoela.

Igande arratsaldean eraman zuten gaixoa Bilboko ospitalera, eta haren egoera egonkorra da. Hura da erreferentziako bi osasun zentroetako bat ebola birusaren gaixotasuna egon litekeela susmatutako kasuentzat ezarritako protokoloan. Donostia ospitalea da bestea.

Egindako analisien arabera, baieztatu dute pazienteak gaixotasun infekzioso bat daukala, digestioan jatorria duena, eta horretara egokitutako tratamendua ipini diote. Pazientearen sintomak ikusita eta gaixotasunak eragindako herrialde batetik, hau da, Nigeriatik etorri berria zenez, protokoloa martxan jarri zuten.

Bestalde, Josu Erkoreka Eusko Jaurlaritzako bozeramaileak iragarri du Osakidetzak indartu egingo duela profesionalen prestakuntza ebolaren aurrean. Halaber, Madrilgo kasuaren harira "zuhur" jokatu behar dela esan du.

Abuztutik hiru aldiz aktibatu dute ebolaren kontrako protokoloa, baina batek ere ez zuen birusa.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna