KURDISTAN

Kerry: "Kobanek ez du EIren kontrako estrategia definitzen"

Ameriketako Estatu Batuetako estatu idazkariak aitortu du Estatu Islamikoari Iraken aurre egitea dela lehentasuna.

Kurduak eta ISeko miliziak borrokan Kobanen, Urfatik —Turkiaren mendeko Kurdistandik— eginiko argazkian.
Kurduak eta ISeko miliziak borrokan Kobanen, Urfatik —Turkiaren mendeko Kurdistandik— eginiko argazkian. Tolga Bozoglu / EFE

Berria -

2014ko urriak 13

Agerraldi bat egin zuen atzo Kairon John Kerry AEBetako estatu idazkariak, eta bertan zehaztu zituen EI Estatu Islamikoari aurre egiteko aliantzaren estrategiaren lehentasunak. Kerryren esanetan, Irakeko armada berriro osatzea da zeregin nagusia. Horretarako, ordea, denbora behar dela azaldu du.

EI Kobane bereganatzeko borrokan ari dela-eta, Kerryk "tragediatzat" deskribatu du bertan gertatzen ari dena, baina ohartarazi du hango egoerak ez duela EIren kontrako koalizioaren estrategia definitzen.

Turkiako presidente Recep Tayyip Erdoganek, berriz, nabarmendu du Kobanen gertatutakoak ez direla Turkiaren ardura —Siriaren mendeko Kurdistanen dago Kobane, Turkiaren mugan—, eta "traidore" deitu die EI babestea egozten diotenei.

Larunbatean, ekintzaile talde batek eskaera ofiziala egin zien AEBei Siriako kurduen YPG miliziei armak eman diezazkieten EIri aurre egiteko. 100.000 sinadura biltzeko helburua daukate. Esan dute "arma hobeekin" YPGek Kobane hiritik bidali ahalko luketela EI.

EIko hamahiru kide hilik

Kurduek Kobane hegoaldetik egin dute aurrera azken orduetan, eta EIko hamahiru kide hil dituzte, Siriako Giza Eskubideen Behatokiak jakinarazi duenez. Erakundeak azaldu duenez, kurduak zeuden gune bati eraso egin dio EIk lau aldetatik, baina bertako biztanleek eutsi, eta aurrera egitea ere lortu dute, EIren esku zeuden bi gune bereganatuz.

Gainera, nazioarteko koalizioko hegazkinek bost bonbardaketa egin dituzte Kobanen eta inguruan.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna