ekialde hurbila

Jerusalemen polizia bat hil da, Hamasek bere gain hartu duen eraso batean

Gidari batek oinezko talde bat harrapatu du. Gutxienez beste hamahiru zauritu daude.

Erasoa burutzeko erabilitako furgoneta. /
Erasoa burutzeko erabilitako furgoneta. / Jim Hollander/Efe

Adrian Garcia -

2014ko azaroak 5

Gutxienez lagun bat hil eta beste hamahiru zauritu dituzte gaur Jerusalemen, furgoneta bateko gidariak oinezko talde bat harrapatzean. Eguerdian izan da erasoa, eta Israelgo Poliziak tiroz hil du ustezko erasotzailea. Polizia iturrien arabera, Ibrahim al-Akari da erasotzailea, 48 urteko palestinarra. Israelgo hedabideek diotenez, biktima 30 urteko segurtasun indarretako kidea da.

Luze gabe, Hamasek bere gain hartu du erasoa. “Ibrahim al-Akari, Jerusalem ekialdeko herritarra, erasoa egin duen gidari ausarta da”, azaldu du mugimenduak Gazako hedabideek argitaratutako oharrean.

Iragan urriarren 22an, beste gidari batek autobus geltoki batean zain zeuden oinezko talde baten aurka egin zuen.


Erreakzio ugari eragin ditu erasoak. Jerusalemgo alkate Nir Barkatek “terrorista eta muturreko ekintzaileen” aurka borrokatuko dela hitzeman du. Israelek Jerusalem hiriburutzat du, nahiz eta nazioarteak horrela ez aitortu 1967ko gerraz geroztik militarki okupatuta egoteagatik. Aste honetan bertan, Jerusalemgo iparraldean 400 etxebizitza eraikitzea adostu du Israelgo Gobernuak, Zisjordaniako lurralde okupatuetan.

Bestetik, Al-Aqsako meskitan liskarrak izan dira goizean. Eskuin muturreko talde juduak meskitan sartu dira, eta palestinar fededunei jazarri zaie. Gobernuz kanpoko erakunde palestinarrek salatu dutenez, Israelgo Poliziak kolonei meskitan sartzen utzi diete, eta gero babestu egin dituzte. Poliziak Meskiten Zelaia itxi du ondoren.  Atzo ere liskarrak izan ziren inguruan, palestinarren eta polizien artean. Jordaniak Israelgo enbaxadore Walid Obeidat kontsultetara deitu du, gurtze lekuaren aurkako “orain artean ikusi gabeko oldarraldiarengatik”.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna