Kréyol (II)

Igande goiza. Bezperako igelen karakak isilduak dira. Emma Luc-etik jaisten naiz. Fort-de-Franceko hiri bihotzeraino heltzeko. Goiz da. Eskailera hertsiak, etxe ttipi apainduak. Koloreanitzeko loreak. Eskailerak berriz. Landare tropikalak. Emazteak etxeko lanetan ari. Entzuten ditut kanpotik: zolen karrakatze, itsas-ukaldi, baldetra uren botatze. Atarien freskura zaintzeko. Azkenean, galdu naiz karriken labirintoan. Zein eskailera har orain?... Ustekabetan —pantera bezain zalu— ateratzen zait etxe baten barnetik mutil luze mehe bat. Ile trentzatuak lepo gibelean bilduak. Saskibaloiari arropa urdin zuriz beztitua. Frantsesez: «Badirudi galdua zarela...». Irriz: «Ba al dakizu leku honetan bide guziak badoazela Erromara?... Edozein pasaia duzula hartzen, beti helduko zarela beherera...?». Agurtzeko eskua altxatuz: «... Erroma-ren bisita atsegina opa dizut!...». Tele antena parabolikoak. Han urrunean, katedralaren dorre punta, Karibe itsasoa. Beherera heltzean, Gustave Michel karrika, ehorztetxe baten publizitatea: «... Gorputzaz ardura gaitezke osoki, DOM-TOM-etara [itsasoz bestaldeko Frantziara] aberrira dezakegu gorputza...». Levasseur kanalaren ur berdeak. Kokondoen kaskoak haizeak harrotzen. Merkatu hetsia. Isiltasun. Telefono kabina hautsitik hariak dilindan. Afixa urratuak kabinan kolatuak. Batean danbor-joleak. Eta kreoleraz: Swaré bélé Kannigwé, Tanbou belé, Fondok Tanbou. Bestean, Martinikako mapa: Swaré Bélé Kannigwé, F. Fannon, A. Césaire, E. Glissant, Combattants de la liberté, Réspé pou chimen libèté. Errespetua, libertate-bidearentzat. Mapan, beltzen libertate koloreak: gorria, berdea, beltza...