Ikasi, Tom, baina ez lo hartu

Ardoa edanez gustura egon ginen atseden egunean, baina ederki damutu naiz gaur! Atseden egunak ez zaizkit batere gustatzen, eta bestela ere erabat ondo ez nenbilenez... Irteera oso-oso azkarra izan da, eta izugarri sufritu dut. Azken mendatea igotzen noiz hasiko zain egon naiz egun guztian, taldetxo batean sartu eta lasai-lasai joateko.

Hori bai, taldeak oso lan ona egin du. Luis Leon [Sanchez] ihesaldian sartu da, eta amaieran gertu eduki du garaipena. Tira, gertu ez, Moncoutiek horrelakoetan ez duelako inoiz huts egiten. Lau urte daramatza antzeko etapak irabaziz, eta nik ederki sufritu nuen horietako batean, Pla de Bereten. Oso txirrindulari indartsua da, eta horrelako ihesaldietan ia beti lortzen du arrakasta.

Baina, eguneko kontuak alde batera utzita, taldekide gazte bati buruz hitz egin nahiko nizueke gaurkoan: Tom Jelte Slagterri buruz. Oso gaztea da, 22 urte besterik ez dauzka, eta estimu berezia diot. Etorkizun handiko txirrindularia da, eta Manzanedan gora lan zoragarria egin du Baukeren [Mollema] mesedetan. Etorkizun hurbilean poz asko emango dizkigu. Ziur nago. Simoniren ondoan igaro nituen lehen urte haiek ekarri dizkit gogora Tomek. Nik ere bizpahiru aldiz egin behar izan nuen berak Manzanedan gora egin duen lana. Baina, tamalez, ni dagoeneko ez nago lan horietarako.

Igotzaile fina da, baina erlojupekoetan ere ez da herrena. Ikastera etorri da Vuelta honetara, eta horixe esan nion nik ere, aprobetxatzeko zeukan aukera bakoitza. Egun bakoitzean ikasteko esan nion, eskolan bezala begiak ireki eta ikasteko; baina lorik ez hartzeko. Izan ere, azkar ikasi behar dira gauzak, ezin da bizi etorkizunera begira. Eta Tom esaneko mutila da. Esandako guztia betetzen du, eta urrutira iritsiko da.

Joaquim Rodriguezi dagokionez, kalkuluak ateratzen zaizkiola esan du, baina niri ez zait ba halakorik gertatzen. Azken mendatea hasi aurretik oso gaizki zihoala esan dit, nahiz eta bere distantzian ez daukan parekorik. Hori bai, mendiko etapa bat gutxiago geratzen zaio, eta zazpi segundo besterik ez ditu irabazi. Gutxiegi, nire ustez. Baukerekin ateratzen zaizkit kalkuluak hobeto. Dezente hobeto. Kontuz berekin, oso ondo baitago.