Blogeu

Mikel iturriak «Ez dugu Euskadiko Blogarien Elkarte bat behar» (http://tinyurl.com/iturri-blogeu) mezuarekin eztabaidari hasiera eman dio eta Mikelekin erabat ados nago. Beharbada, orain dela urte batzuk zentzua izan zezakeen; orain, aldiz, denok ezagutzen ditugu, eta Interneten aurki dezakegun laguntzarekin nahikoa ez badugu, laguntzeko prest dagoen jendea erraz aurki dezakegu. Helburu hori balitz: aprendices, blogs&beers, fish&txips eta halako ekimenak aspalditik izan dira, elkarterik behar izan gabe ere.

Oraindik zentzua izango luke, eibar.org, blogsoviet, txintxarrisfera eta haien gisako ekimen bat balitz. Jendeari bere bloga sortzen lagundu eta baliabideak eman, baina batez ere horren inguruan komunitate bat eraiki nahi izango balitz. Eztabaida bateratu bat izateko gogoaz gain, ezaugarri antzekoak dituzten pertsonen arteko komunitate bat sortzeko. Ez dut uste hori ere helburua denik.

Baina, gainera, zergatik izendatu Euskadiko Blogarien Elkartea? Izen horrekin ezin da beraiek dioten bezala beste nodo bat izan. Blogeu bitartekari izatea lortu nahi dutela pentsarazten dute. Ahots ezberdinez osatutako sare banatua, blogosfera, ahots bakar batera murrizteak sare horren aberastasunari erasotzen dio. Ondoren, bitartekaritza horren bidez botere espazioetan ordezkaritza bilatu nahiko balute bezala.

Orduan, zergatik sortu? Jakin badakite bitartekaritza hori lortuz gero askoren izenean hitz egin ahal izango dutela. Hedabideek, adibidez, zeini deituko diote Interneten dabiltzan iritzi emaileak bilatzeko esfortzu handirik egin gabe? Laster hemen ere «Euskadiko blogariek» sustatutako blogarientzako ekimen erraldoiak eta manifestuak ikusten has gaitezkeela iruditzen zait.

Klonatu bai, baina euskal blogosferarekin duten harremana eskasa baino gehiago izan da. Hasieratik euskararekin izandako jarrerak ez du hauen integrazioa errazten (nahiz eta lagun bakar batzuk bertan egon). Euskaldunok gai tematiko bat dirudigu, bete beharreko kuota bat.

Blogariak ahots propioa dugulako gara blogari. Sortzen ditugun komunitateek zentzua hartzen dute, ahots horiek eztabaida bihurtzen direlako eta eztabaida horiek adostasun. Ez du zentzurik, beraz, ahots propio horiek guztiek bitartekari bat izatea, komunitate bat ez badago, tresnak ez baitu komunitatea egiten.