Kataluniar zinemaren berpizkundea

Malagako zinema jaialdian Patricia Ferreira madrildarraren Els nens salvatges filmak irabazi du sari nagusia. Istorioak inkomunikazioaren gaia dauka ardaztzat. Bartzelonan kokatuta dago, eta protagonistak katalanez mintzatzen dira. Azken urteotan produkzio katalanak sari garrantzitsuak lortzen ari direla ukaezina da. 2010ean hogei pelikula katalan estreinatu ziren Donostiako Zinemaldian, eta sail ofizialean Pa negre, Elisa K., Aita eta El gran Vázquez lehiatu ziren. Gerora Agusti Villarongaren Pa negre-k bederatzi Goya irabazi zituen eta Espainiako Zinema Akademiak Oscarretarako lehiatzeko aukeratu zuen. Katalanez grabatutako film batek ez zuen ordura arte halako arrakastarik eta onespenik erdietsi. Iazko Zinemaldian Isaki Lacuestaren Los pasos dobles liluragarriak Urrezko Maskorra eraman zuen, eta beste behin Pompeu Fabra unibertsitatean sorkuntza dokumentalaren masterrean egiten ari diren lana aitortu zuen epaimahaiak. Masterra 1998an jarri zuten martxan, eta lehen aldi hartan Lacuestak ikasle gisa parte hartu zuen. Azken hamarkadetan dokumentalaren alorrean proposamen interesgarri eta ausartak egin dira Bartzelonan; Jose Luis Guerinen En construcción filmak (2000), esaterako, kritikaren saria eta sari berezia jaso zituen Donostian. 2010ean Rotterdamen UPFko hamar lan proiektatu ziren. 90eko hamarkadan Madrilgo industriaren hegemonia nabaria zen, baina azken urteotan Kataluniako ekoizpenak zeresan handia ematen ari dira. 2008an Kataluniako Zinema Akademia eratu zuten eta Gaudi sariak sortu zituzten. 2009ko urtarrilean banatu ziren lehendabizikoz Gaudi sariak, eta Albert Serraren El cant dels ocells-ek katalanezko film onenaren garaikurra eskuratu zuen. Serraren Honor de cavalleria (2007) opera prima urteko hamar lanik onenen artean zegoela berretsi zuten Cahiers du cínéma aldizkariko arduradunek. Bestalde, Jaime Rosales Cannesera itzuliko da, Sueño y silencio lan berriarekin.