Sei eskalada dira ikurra jasotzeko hautagaiak, eta Michael Kennedy da epaimahaiko burua —alpinista eta AEBetako Alpinist aldizkariko editorea da Kennedy—. Valeri Babanov, Ines Papert, Liu Yong eta Alberto Iñurrategi mendizaleek eta Alessandro Filippini kazetariak osatzen dute epaimahaia. Haiei dagokie erabakitzea. Alpeetatik Patagoniara nahiz Alaskatik Himalayara, munduko mendikate guztietako 86 eskaladaren artean egin dute lehenengo galbahea, eta nabarmendu dituzten sei eskaladen artean aukeratu beharko dute. Horratx sei jardueren zertzelada laburra, Alberto Iñurrategiren azalpenek jantzita.
Pobeda mendia (7.439)
Kazakhstandarren atrebentzia
Asiako Urrezko Pioletarekin saritu dituzte Denis Urubko eta Gennady Durov kazakhstandarrak, Pobeda mendian (7.439) abuztuan ireki zuten bideagatik. Beste sari bat jasotzeko modua dute orain. Urubkok eta Durovek ia 3.000 metroko horma gainditu zuten, eta 6a eta M4 zailtasuneko tarteak eskalatu. Bideari Dollar rod izena jarri zioten. «Atrebentzia handiko igoera iruditu zait, oso gogorra; mendi garaian egindakoa eta arrisku handikoa», laburbildu du Iñurrategik.
Sasser Kangri II (7.518)
Esplorazioaren bidetik
Estiloa eta esplorazioa ditu ezaugarri bigarren hautagaiak. AEBetako Mark Richey, Freddie Wilkinson eta Steve Swenson alpinistak 2011ko udan Indiara joan ziren, eta igo gabe zeuden mendirik garaienen artean bigarrenera igo ziren: Sasser Kangri II (7.518 m). «Lehenengo igoera da. Teknika aldetik, ez da oso zaila, baina estilo onean igo dute, era alpino klasikoan, esplorazio ukituarekin eta talde lan politean». Ladakh eskualdean dago mendia, eta inguru hartan daude mendizaleentzat ezezagunak diren mendietako asko. Hego-mendebaldeko horman hiru bibak egin behar izan zituzten, eta 1.700 metroko desnibela gainditu.
K7 (6.934)
Esloveniako eskolaren eredua
Karakorumgo eskalada interesgarrienetako bat egin zuten Luka Strazar eta Nejc Marcic gazteek, K7 mendiaren (6.934) mendebaldeko pilarean bide bat irekita. Alpinismoak indar handia du Eslovenian, eta herrialde hartatik irten dira azken urteetako mendizale indartsuenetako asko. Haietako batek laburbildu zuen gazteek egindakoa, Marko Prezeljek: «Zoriontzekoa da. Mendebaldeko pilaretik bide bakar bat zegoen irekita [Prezeljek berak, Steve Housek eta Nick Andersonek ireki zuten, 2007an]. Himalayara lehenengoz joan direla aintzat hartuta, lorpen handia da».
Lau egunean eskalatu zuten pilarea. Bideak 1.600 metroko luzera du, eta VI/5, M5 eta A2 zailtasuna. Iñurrategiren gustuko eskalada da: «Asko gustatzen zaidan igoera da; alpinoa eta teknikoa, altuera handian eta estilo arinean egina. Eredugarria da Esloveniako eskola. Maisu onak izan zituzten eta ikasle finak ateratzen dira».
Xuelian (6.249)
Interesgarri eta ederra
Esloveniako alpinistek egindako beste eskalada bat ere aukeratu dute hautagaien artean: Ales Holc, Peter Juvan eta Igor Kremser hirukoak Ipar-ekialdeko Xuelian mendira (6.249 m) egindako lehenengo igoera. «Igoera interesgarria eta ederra. Eskalada mistoa, alpinoa, 2.000 metrotik gorako igoera, izotzean 60-80 graduko tarteak dituena... Eskalada dotorea», nabarmendu du Iñurrategik. Mendebaldeko ertzetik igo ziren, eta irekitako bideari Arete of trust izena jarri zioten (2.400 m, ED2, AI5, M5+).
Erdiko Meru (6.310)
Marrazoaren hegalari kosk
Conrad Anker, Jimmy Chin eta Renan Ozturk estatubatuarrek Erdiko Meru (6.310 m, India) dotorearekin aspalditik zegoen zorra kitatu zuten 2011ko urrian: Shark's Fin edo marrazoaren hegala eskalatu zuten. Mendiaren ipar-mendebaldeko horman dago ezin nahasizko hegal hori. «Bereziki da bide estetikoa. Kapsula estiloan igo dute, eta igoera zaindua egin. Baina, sariketa honen irizpideak kontuan hartuta, zalantzak eragin ditzake. Edonola ere, oso igoera gogorra da; hamabi egun horman, A4ko zailtasuna artifizialean... ezaugarri interesgarriak ditu», dio Iñurrategik. Bertatik igotzen saiatu ziren aurretik Valeri Babanov, Doug Chabot, Bruce Miller, Silvo Karo... Anker, Chin eta Ozturk izan dira aurrenak.
Egger dorrea (2.850)
Muturreko eskalada teknikoa
Urtea bukatzear zela iritsi zen Patagoniako Egger dorrean Bjorn-Eivind Aartun eta Ole Lied norvegiarrek egindako eskalada dotorearen berria. Venas azules izena jarri zioten bideari (950 m, 6b+, A1, AI6). «Teknika aldetik, ikaragarri zaila, Patagonian ikur bihurtu den mendian, Eggerren. Eskalada berritzailea izatearen ezaugarria dauka, zailtasuna muturreraino eraman dutelako izotzean. Ikaragarria iruditu zait, txapela kentzekoa». Hautagaietako bat zela ezagutzearekin batera iritsi zen ezbeharraren albistea: Norvegiako Kjerag mendian eskalatzen ari zela hil zen Bjorn-Eivind Aartun. Chamonix eta Courmayeurko galan gogoan izango dute.
