Ostegunean irekiko dute Altitoy 2012 proban izena emateko epea

Ate-joka dator urtaro zuria, eta mendiak zuritu orduko abiatuko da mendiko eskiko lasterketen denboraldia. Altitoy 2012 izango da parte hartzaile gehien erakarriko duen Pirinioetako lasterketa. Urtarrilaren 28an eta 29an jokatuko da, eta ostegunean irekiko dute izena emateko epea. Gehienez 500 parte hartzaile onartuko dituzte, eta aurreko ekitaldietan zer gertatu den ikusita, izena emateko bizi ibiltzeko aholkua eman dute antolatzaileek. Urtero bezala, bi ibilbide prestatuko dituzte: A ibilbidea, zailtasun handiagokoa, eta B ibilbidea, lehiarik gabekoa. Eguraldiaren arabera moldatuko dituzte. Azken horretako parte hartzaileek bikoteka aurkeztu beharko dute. Izena www.kirolprobak.com webean eman behar da. Argibideak: www.altitoy.com.