'Euskalduna naiz, eta zu?' saioaren aurkako auzia itxi du epaileak

Martxoan hautsak harrotu ziren ETB1eko Euskalduna naiz, eta zu? saioaren Espainiari buruzko atala zela eta. Saioaren eta parte hartzaileen aurkako irainez eta erasoez gain, programa bera auzitara eraman zuten eragile batzuek. UPNk eta Espainiako Poliziaren SUP sindikatuak, esate baterako, salaketak jarri zituzten, saioak "Espainiarekiko gorrotoa" sustatzen zuelakoan. Iruñeko 5. Instrukzioko epaileak auzia artxibatu duela jakinarazi dute gaur. Autoaren arabera, epaileak dio saioko edukiak ez duela gorrotoa, bazterketa edo indarkeria sustatzen. Epailearen arabera, saioak "esaldi desegoki batzuk" izan ditzake, baina, programaren "testuingurua osorik" hartuta, ez dago Espainia iraintzeko deliturik. Era berean, salatzaileek esaten zuten Espainiako banderaren eta ereserkiaren aurkako irainen delitua zegoela, baina epaileak erabaki du ez dagoela halakorik. Epailearen autoari helegitea jartzeko aukera dago.