ASTEBURUKO PROPOSAMENAK. Denak 'Hitza'-ri tiraka

Herri kirolak gustuko dituztenak eta euskaltzale direnak elkartuko ditu Busturialdeko Hitza-k larunbat arratsaldean Kortezubiko pilotalekuan (Bizkaia). Eskualdeko euskarazko egunkariak herri kirol saioa antolatu du aurrenekoz. Norgehiagoka 18:00etan hasiko da.

Desafio ikusgarria izango da. Gizon talde bat eta idi bat eta zaldi bat, harriei tiraka ibiliko dira. Zein baino zein indartsuago ibiliko dira, eta besteek baino iltze gehiago egiteko gai direla erakutsi beharko dute.

Lehian arituko direnak ezagunak dira herri kirolak gustuko dituztenen artean. Urriolabeitiaren idia Kortezubikoa da, Oma auzokoa. Zaldia, berriz, Gernika-Lumoko Gernika jatetxeko nagusiek eramango dute. Eta gizon taldea Markina-Xemeindik etorriko da. Gizon probetan Bizkaiko txapeldunak dira markinarrak.

Lehiakideetako bakoitzak bere ahalmenen araberako pisua duen harriari egin beharko dio tira. Gizon taldeak Kortezubiko harri handia eraman beharko du arrastaka. 1.350 kiloko pisua du. Idiari eta zaldiari, berriz, harri txikiagoa egokitu zaie: 930 kiloko pisua izango du. Nahiz eta ezberdintasuna egon bi harrien artean, gizon taldeak eta bi animaliek duten indarrari egokituta daude, eta hala lehia ere oso parekatuta egongo da. Beraz, ikusgarritasuna ziurtatuta egongo da.

Kortezubiko Beti Pozik herri kirolen elkarteko kideak arituko dira epaile lanetan. Garaileak Gernika jatetxeak eman duen tapakia eskuratuko du. Halere, parte-hartzaile guztiek jasoko dute oroigarria.

Kirola baino gehiago

Saio batetik besterako tartean Natxituko bertso eskolako ikasleak (Ea, Bizkaia) bertsotan arituko dira. Desafioari festa giro handiagoa emateko, txosna jarriko du Busturialdeko Hitza-k pilotalekuan. Hor egingo da hainbat produktuz osatutako saskiaren zozketa ere. Dirua eskualdeko egunkariaren alde izango da. Txartelak dagoeneko salgai daude, euro baten truke, Hitza-ren bulegoetan, Gernika jatetxean eta Ipar tabernan.

'HITZA'-REN DESAFIOA

Zer. Zaldi, idi eta gizon dema.

Non. Kortezubiko pilotalekuan (Bizkaia).

Noiz. Etzi, 18:00etan.