Bizitzako musika

Iban Zalduaren Biodiskografiak liburuan oinarrituriko hitz eta musika emanaldia eskainiko dute gaur Eibarren. Liburuko ipuinak irakurriko ditu egileak berak, eta Xabier Montoiak zein Ibon RGk musika jarriko diote idazlearen bizitzan garrantzia izan duten kantei.

Ipuin bilduma argitaratu zuen Zalduak Biodiskografiak lanean. Denera 39 ipuin labur dira, hiru orrialde ingurukoak. Disko batek iradoki du narrazio bakoitza.

Autobiografia eta fikzioaren artean mugitzen dira Zalduaren istorio musikalak. Egileak ez du diskoen aitzakia erabiltzen entzuleei bere bizitza kontatzeko. Esperimentu gisa planteatu zuen hasieran, baina, azkenean, lan «konbentzionala» atera zitzaiola aitortu zuen idazleak. Beraz, inorentzat ez da zaila izango literatura lanok entzutea, emanaldia taberna batean egin arren.

Naiz eta ipuin bildumak entziklopedia kutsua hartu, Zalduak ez zuen pop disko onenen zerrendarik egin nahi. Halaber, gaur irakurriko dituenak ez dute zertan izan idazlearen disko edo kanturik gogokoenak. «Istorio bat sortzeko edo oroitzapen bat esnatzeko gaitasuna izan duten albumak» aukeratu ditu. Tartean dira The Beatlesen Revolver diskoa (1966) eta Paul Wellerren 22 Dreams (2008). Batez ere 1980ko hamarkadakoak izango dira kantuak, egilearen nerabezarokoak.

'BIODISKOGRAFIAK'

Noiz. Gaur, 19:00etan.

Non. Karrika tabernan,Eibarren (Gipuzkoa).