Duela 42.000 urteko arrantzarako lanabesak

Orain dela 42.000 urte hezurrekin egindako amuak eta arrainen arrastoak (besteak beste, hegaluzearenak) aurkitu dituzte Ekialdeko Timorren. Historiaurreko arrantzarako lanabesak kostaldetik urrun eta 12.000 urte baino antzinagokoak aurkitzea oso ohiz kanpokoa da. Timorren aurkitutako fosilak arrantzarako baliatutako lanabes antzinakoenak dira. Sue O'Connorrek (Australiako Unibertsitate Nazionala) egin du aurkikuntza, eta haren berri eman du Science aldizkariak. Ezaguna zen duela 50.000 urte gizakia Australiara iristeko gai izan zela, baina itsaso zabalean arrantzan aritzeko zuen gaitasunaz ez da askorik ezagutzen.