Eguzkia gori-gori ikusteko

Euskadiko Biodibertsitate Zentroaren eta Bizkaiko Astronomia Elkartearen artean eguzkia behatzeko saio bat antolatu dute, gaurko. Busturiko Madariaga dorretxearen kanpoaldean egingo dute, eguerdi aldera.

Saioa hitzaldi batekin hasiko da —20-30 minutukoa—. Eguzkiaren inguruko oinarrizko kontzeptuak azalduko dituzte, eta behaketan ikusiko dena ulertzeko informazioa emango dute. Gainera, parte hartzaileek galderak egiteko aukera izango dute, zalantzak uxatzeko.

Behaketa 12:00 inguruan hasiko da. Bizkaiko Astronomia Elkarteak eguzkiaren orbanak ikusteko argi zurizko teleskopioak jarriko ditu lanean. Iragazkiak dituzte gailu horiek: eguzkitik ateratako materia multzoak ikusteko hidrogeno alfa filtroa tartean. Behaketa egiteko, gutxienez lau teleskopio jarriko dituzte.

Eguzkia Lurretik hurbilen dagoen izarra da, eta gure zeruko objekturik argiena. 150.000.000 kilometrora dago, eta zortzi minutu behar ditu han sorturiko argiak geuregana heltzeko. Eguzkia bi garaitan soilik beha daiteke begi bistaz, arriskurik gabe: zerumugatik hurbil dagoenean eta erabateko eguzki eklipseetan. Jardunaldia 14:00 aldera bukatuko da. Doan da, baina parte hartzeko beharrezkoa da aurretik izena ematea: 94-687 04 02 edo [email protected].

EGUZKI BEHAKETA

Noiz. Gaur, 11:30ean.

Non. Busturiko (Bizkaia) Madariaga dorrean.