Ekobira azoka ibiltaria Azpeitira iritsiko da bihar

Garapen iraunkorraren araberako kontsumo azoka egingo da bihar, Azpeitian (Gipuzkoa): Ekobira. Kutxa Ekoguneak antolatu du, eta ekoizle ekologikoak, eskulangileak, material birziklatuekin lan egiten dutenak eta energia berriztagarrien sektoreko enpresak bilduko ditu. Herriko plaza nagusian izango da, 10:30etik 14:30era eta 16:30etik 19:30era.

Ekobira merkatu ibiltari bat da, eta aurten Gipuzkoako zenbait herritatik pasatu da dagoeneko. Hamargarren geldialdia egingo du Azpeitian. Gaur egun nagusi den kontsumo eredutik aldenduta kontsumitzeko beste modu bat badagoela azalaraztea du helburu. Horretarako, produktu eta zerbitzu ekologikoen alde egiten du; ingurumenean eragin txikiagoa duten horien alde. Elikadura eta eskulangileen saltokiak ez ezik, berrerabilera eta energia berriztagarriak bultzatzen dituzten enpresak egongo dira.

Herritarrek erabiltzen ez dituzten gauzak, hain zuzen, merkatuan jarriko duten gordailuan utz daitezke, saldu edo musu truk emateko, norberaren arabera. Azoka amaitzean gordailuan geratzen diren ondasunak jabeari itzuliko zaizkio.

Hitzaldiak eta tailerrak

Salerosketaz gain, hitzaldi eta tailerrak antolatu dituzte, bizimodu eramangarriagoa egiten ikasteko. 10:45ean, oinetakoak muntatzeko tailer praktikoa egingo da. Bazkaldu aurretik, erroskila tailerra eta bizikleta elektrikoen inguruko hitzaldiak izango dira. Baita Azpeitiko museoaren 25.urteurrena gogoratzeko hitzaldia ere, eta Goiener kooperatiba eta Giez Berri eztia egiten duen elkartearen solasaldiak.

Arratsaldez, 16:45ean, Zuhaizki, leiho ekologikoak sortzen dituen enpresa ezagutzeko parada izango da. Birziklatutako materialekin egindako bitxigintza tailerra, eta paleen eta eguzki energiaren bidez funtzionatzen duten galdaren gaia jorratuko dituzte, ondoren. Indarrak hartzeko taberna ekologikoa egongo da irekita egun osoan.