Eztanda, izatearen jatorri

Napoka Iriak bere lehen disko luzea aurkeztuko du gaur Eibarko Karrika tabernan (Gipuzkoa), 22:00etan. Urtarrilean Bergarako Zabalotegi aretoan (Gipuzkoa) emandako kontzertu batean grabatu zuten Lehertarazi edifizioak lana.

Guztira hamar abestik osatzen dute diskoa: abesti berri, zahar eta bertsio bat edo beste entzun daitezke bertan.

Halere, ez da taldeak argitaratzen duen lehen lana. Izan ere, seina abestiz osatutako bi disko kaleratuak dituzte aurretik. 2005ean sortu zuten Miren Narbaizak eta Ander Mujikak Napoka Iria, eta ordukoak dira euren lehenengo abestiak.

Urte berezia izan zen 2008a bikotearentzat. Izan ere, euren hurrengo lana argitaratzeaz gain, mugak gainditu eta kontzertu-itzuli labur bat egin zuten Japonian.

Bi gitarrak eta Narbaizaren ahotsak osatzen dute Napoka Iria taldearen musika. Noizean behin kolaborazioren bat edo beste izaten dute, baina ez dute bateria edota perkusio lagungarririk behar agertokia betetzeko.

Narbaiza eta Mujikak pixkanaka gaur egungo musikan euren lekua aurkitu dutela nabari da, eta, horren erakusle, hamaika kontzertu eskainiak dituzte dagoeneko.

NAPOKA IRIA

Noiz. Gaur, 22:00etan.

Non. Karrika tabernan, Eibar (Gipuzkoa).