Filmak, ideologiaren ispilu

Gaur amaituko da Anarkistak zikloa Ibu Hots aretoan (Gasteiz). Hain zuzen ere, Blake Edwardsek (1922-2010, AEB) zuzendutako The Party (1968) filmaren emanaldiarekin amaituko dute zikloa, 20:30ean. Sistemaren parte izan nahi duten baina beraien izaerak —eurek nahi gabe inguruan kaosa sortzeko gaitasuna dute— hori oztopatzen dien pertsonez hitz egiten du.

Zuzendari, gidoigile eta ekoizle izan zen Edwards, zineman eta telebistan. Hainbat sari jaso zituen egindako lanengatik: 1963an, esaterako, Donostiako Zinemaldian zuzendari onenaren Zilarrezko Maskorra irabazi zuen.

Anarkistak zikloa lau filmez osatu dute. Irailaren 11n hasi zen, Claude Faraldok zuzendutako Themroc filmarekin (Frantzia, 1973). Messidor filma eman zuten ondoren (Suitza-Frantzia, 1978), Alain Tannerrena, eta Maravillas Manuel Gutierrezen filma proiektatu zuten gero (Espainia, 1980).

Urriaren 9an beste ziklo bat hasiko dute Ibu Hots aretoan: Kontrakultura zikloa, hain zuzen ere.

Beste lau film eskainiko dituzte orduan: The Weather Underground (AEB, 2003), Fugazi, Instrument (AEB, 1999), Naked Lunch (Kanada, 1991) eta Crumb (AEB, 1994).

ANARKISTAK ZIKLOA

Non. Ibu Hots aretoan, Gasteiz .

Noiz. Gaur, 20:30ean.

Zer. Blake Edwardsen The Party filmaren emanaldia