Foursquarek Google Maps ordezkatu du OpenStreetMap zerbitzuarekin

Geolokalizazio sare sozialik ezagunenetarikoa da Foursquare (https://foursquare.com/). Aplikazio horren bitartez, erabiltzaile batek check-in egin dezake egoten den leku guztietan, eta kokapenari buruzko informazioa eman. Bide batez, erabiltzaileak berarentzat interesgarriak diren lekuak marka ditzake. Sumatu daitekeenez, oso bideratuta dago sakelako telefonoetan erabiltzeko, baina webgunean ere erabil daiteke ordenagailu batekin.

Hala, bada, webgunerako bertsioan aldaketa sakon bat egin dute egitasmoaren garatzaileek. Izan ere, orain arte Google Maps erabiltzen zuten, mapa azpiegitura gisa, geolokalizazio zerbitzuetarako. Baina, web ingurunean, OpenStreetMap zerbitzua aukeratua dute dagoeneko, Google Mapsen ordez. OpenStreetMap (http://www.openstreetmap.org/) zerbitzu irekia da eta Internet erabiltzaileak auzolanean osatuz joaten dira.

Hala ere, aldaketa hori soilik web ingurunean egin dute, eta, oraingoz, sakelako telefonoetarako aplikazioetan Google Maps erabiltzen da.

Aldaketa hori mugarri bat da Foursquare proiektuan, eta, agian, bultzada garrantzitsua izan daiteke OpenStreetMap proiektuarentzat.