Garagardo ziztada

Garagardo festa egingo dute Lazkaon (Gipuzkoa) ostegunetik igandera bitartean, Gerriko kultur elkarteak antolatuta. Herriko plazan eta pilotalekuan jarriko dituzte karpak, jendeak janariaz eta garagardoaz lasai goza dezan. Ez da izango ordea, garagardo festa arrunta. Izan ere, azokaren helburua BERRIA egunkariaren aldeko diru ekarpena eta babesa biltzea baita.

Lau egun horietan, 20:00etatik gauerdira arte egongo da zabalik azoka. Hainbat garagardo mota edateko aukera izango dute garagardozaleek. Horrez gain, ohiko jakiak eta menuak dastatu ahal izango dituzte karpan biltzen direnek.

BERRIA Taldeak urte hasieran abiarazi duen Zure ziztada behar dugu kanpainaren barruan dago ekitaldia. Euskarazko egunkari bakarraren iraupena ziurtatzea da haren xedea, eta antolatzaileek azokara joateko deialdia egin dute.

Garagardo festaren antolatzaileek laguntzaileak behar dituzte lanerako. Garagardo azokan lan egiteko borondatea dutenek Gerriko liburu dendan eta 943- 88 65 00 edo 943-76 02 82 telefonoetan eman dezakete izena. Hainbat txanda egongo dira lanerako.

Lazkaon ez ezik, aste honetan Mungian ere egitekoa da BERRIA egunkariaren aldeko kanpaina. Ostiralean jai giroko bilkura eta kalejira egingo dute herriko BERRIAlagunek. Kantuz, eta trikitia lagun dutela, informazioa emateko aukera baliatuko dute, eta tabernetan harpidetzak eskainiko dituzte. Bentades aterpean bilduko dira, 19:00etan.