Gazte magazin bat eta musikari buruzko saio bat hasiko dira Eguzki irratian

Programazioa berritu du aste honetan Iruñeko Eguzki irratiak. Berrikuntzen artean, gaurtik aurrera asteazkenero Hankaz gora saioa entzun ahalko da, 19:00etan. Gazte giroko magazin horretan mota guztietako informazioa eta elkarrizketak bilduko dituzte. Beste berrikuntza Rebel musik irratsaioa da. Bihartik aurrera emango dute, ostegunero, 18:00etan. Musikaren historiaren inguruko ibilbidea egingo dute horretan, gizarteko aldaketekin musikak izan dituen loturak aztertzearekin batera. Gainera, Irauli uhinak gazte magazina itzuliko da programaziora; ostegunetan emango dute, 23:00etan.

Eguzki irratiak 35 irratsaio emititzen ditu; horietatik 21, Iruñeko emisoran bertan ekoitzitakoak. www.eguzki.net webgunearen bidez munduko edozein txokotan entzun daiteke irratia.