GERIZPEAN. Haurren Eguna gaur Garazin

Seaskaren 40. urteurrena ospatzeko ekitaldien artean, iazko ekainean Haurren Eguna ospatu zen lehen aldiz Kanboko kiroldegian. Ekimen hark izandako arrakasta ikusita, aurten ere Haurren Eguna ospatzea erabaki du Seaskak. Gaurkoa izango da horretarako aukeratutako eguna, eta jaia Donibane Garazin egingo da, bertako Jai Alaian.

Xiba topaketarekin hasiko da eguna, 11:00etan. Irulegiko irratiak animatutako saioan hainbat aukera izango dira haurrentzat: xiba jokoak, puzgarriak, joko kooperatiboak, tailerrak, marrazki txokoak, makillajea... eta auto ttipien zirkuitua ere izango da, Uda Leku elkarteak antolaturik.

12:00etan Garaztarrek dantza emanaldia egingo dute, eta mutxikoen txanda 13:00etan iritsiko dira. Eguerditik aurrera, berriz, ikuskizunak izango dira nagusi Seaskaren Haurren Egunean. Hala, 14:00etan eta 17:30ean Elirale konpainiak Otto ikuskizuna eskainiko du.

Hiru urtetik 7 urte bitarteko haurrentzako prestatutako lana da Otto, eta hamaika galdera eta gogoeta proposatzen ditu. Mundua ikusteko beste modu bat duen Ottorekin batera autoan sartu, eta eguneroko pasarte batetik bestera bidaiatzeko aukera izango dute ikuskizunerako Donibane Garazira hurbiltzen diren haur zein gurasoek. Kantu dantza, antzezpen... ikuskizun berezia da Elirale konpainiarena.

Hebentik taldeak ere emanaldi ederra du gaurko prest. Har eman lanean , burua nahastuta, beti presaka eta galdurik dabilen gizon batek dituen amets ederrak kontatzen ditu: lokartzen denean dantzari, musikari bihurtzen baita, eta eta mundu berri bat zabaltzen zaio.

Azkaingo ikastolako 15 gurasok osatutako ikuskizuna ere izango da gaur gozagarri (16:00). Dantzari eta antzezle bilakatuta, Joxelu Berasategiren zuzendaritzapean, Putxarriko satorrak emanaldia egingo dute. Jesus Aured izango dute musikari eta Hamaia Henebutte da zuzendaritza artistikoa.

Musika, dantza, ikuskizun eta jolasez betetako egunean zehar ez goserik ez egarririk ez izateko, talotegia eta ostatua ere jarriko ditu Seaskak eta Donibane Garaziko ikastolak.

Egitarauan jasotako ekitaldi guztiak doan dira.