Google kontuaren erabileraren berri ematen du Google Activityk

Google Activity zerbitzuaren bitartez erabiltzaileak Google kontuarekin egiten duen erabilerari buruzko estatistika sinple batzuk ikus ditzake. Estatistika horiek sarean kontsultatu daitezke, edo Google Activityk berak hilero bidaltzen duen mezu elektronikoaren bitartez; mezu horren bidalketa desaktiba daiteke zerbitzuaren konfigurazioan.

Zerbitzu hori erabiltzen hasteko, https://www.google.com/settings/activity webgunera joan behar da, eta hor zerbitzua gaitutakoan erabiltzaileak mezu elektronikoa jasoko du; hortik aurrera, hilero jasotzen dira txostenak postaz, eta sarean kontsultatu daitezke estatistikak.

Eskaintzen diren datuak nahiko datu sinpleak dira, baina erabiltzaile edo enpresa batzuei erabilgarriak suerta dakizkieke. Eskainitako datuen artean, hauek daude: erabiltzaileak Googlen saioa hasten dueneko nabigatzaileak eta sistema eragileak, Gmailen jasotako eta bidalitako mezu kopurua, gehien erabilitako kontaktuak, bilaketa kopuruak eta bilaketa kateak eta bilaketa motak, Latituderi buruzko datuak.

Zerbitzu honekin batera Google Dashboard (https://www.google.com/dashboard/) erabiliz gero, norberaren Google kontuari eta kontuaren erabilerari buruzko hainbat datu lor daitezke.