'HausnaUrtu', ikus-entzunezko materiala elkarbanatzeko ataria

Dokumentalak, filmen zatiak, bideoak eta film laburrak elkarbanatzeko blog komunitarioa da HausnaUrtu (Hausnaurtu.wordpress.com). Interesgarria zaion hori besteei helarazteko aukera eskaintzen zaio erabiltzaileari; materiala sarean jartzeaz gain, dokumentu hori nola lor dezaketen azaltzen die kide bakoitzak gainerako erabiltzaileei.

Gainera, sarean jarritako bideo horren inguruko eztabaida eta iruzkinak egiteko aukera zabalik dago parte-hartzaile guztientzat. HausnaUrtu atariaren helburua denen artean egindako ekimena izatea da; telebistan dagoen eskaintzatik aparte, badagoela ikusteko eta ikastekorik. Eta ikasteko modu bat izan daiteke sarean jarritako horiek jatorrizko bertsiokoak izatea. Jatorrizko bertsioan, baina azpitituluekin. Horixe da HausnaUrtu-koek egiten duten gomendioetako bat. Ikus-entzunezkoen munduan murgildu eta horretara norbere ekarpenak egin nahi izanez gero, izena eman eta partekatzen hastea besterik ez dago.