Ilaski Serrano 'Oilategia'-n murgilduko da, Alkainen ordez

Programazioaren zutabe nagusiek ez dute aldaketarik izango denboraldi honetan Euskadi Irratian. Hala, goizetan Jose Juan Ugaldek gidatuko du Albiste Faktoria, eta Manu Etxezortuk Faktoria-ren magazin partea. Arratsaldeetan, Jaime Otamendiren esku jarraituko du Mezularia-k, eta Arantxa Iturberen esku Arratsaldekoa-k. Iaz bezala, asteburu goizetan Arantxa Arzak gidatuko du Amarauna.

Hala ere, berrikuntza batzuk izango dira Euskadi Irratiko programetan eta esatarietan. Esatariei dagokienez, berrikuntza deigarriena Oilategia umore saioan izango da. Anjel Alkainek Ilaski Serranori emango dio erreleboa datorren astelehenetik aurrera. Alkainek Radio Euskadin eta ETB1eko Finlandia-n jarraituko du, baina atseden hartuko du Euskadi Irratian. Serranorekin batera, Jon Iraola eta Mikel Pagadizabal ariko dira kontu kontari. Saioak bere ordutegiari eutsiko dio: astegunetan, 12:30ean. Larunbatetan asteko une onenak izango dira entzungai, 15:00etan.

Denboraldiko beste bi berrikuntza kultur arlokoak dira. Hasiera batean udarako prestatu zituzten Lizardiren Baratza eta Kaja Beltza saioek jarraipena izango dute kurtso guztian. Jose Luis Padronen poesia programa igandetan emango dute, 15:00etan. Mikel Markezen musika saioa, berriz, astelehenetan emitituko dute, 21:00etan.

Ordutegi aldaketa izango dute beste bi saiok: Ele-Alea astelehenetan 20:30ean emango dute, eta Ekosfera larunbat goizetan, 09:00etan. Norteko Ferrokarrila zientzia saioa ordubetekoa izango da aurten, astearteetan, 21:00etan.

Gure Poltsikoa kontsumoari buruzko programak izaera propioa galduko du, baina jarraipena izango du Faktoria magazinaren barnean.

Zinemari buruzko saio berri bat

Euskadi Irratiko programazioko berrikuntzetako bat zinemari buruzko Zinezale saio berria izango da. Arkaitz Basterrak eta Arantxa Kaltzadak gidatuko dute saioa, igandeetan, 15:30etik aurrera. Amarauna magazinean zinemari buruzko atal bat egin izan dute Basterrak eta Kaltzadak, eta tarte horrek saio izaera hartuko du orain. Filmetako soinu bandek protagonismoa izango dute saio berrian, eta haiekin hilero bi emankizun berezi prestatuko dituzte.