Irekidura alternatiboa eginen du Gazte Asanbladak, oren erdi lehenago

Besta alternatiboen irekidura eginen du Baionako Gazte Asanbladak, 21:30ean Cordeliers karrikako balkoi batetik txupinazoa botaz. Baionako bestek islatzen duten «zernahikeri eta gehiegikeria» aldatzeko asmoz, egunero eskainiko dituzte hainbat animazio. Larunbatean izanen dute gazte eguna, joko, bazkari eta manifestazioarekin. Norte Apache taldearen kontzertuarekin bukatuko dute eguna. Jazarpen sexualak, segurtasunaren izenean diren kontrol neurriak, etengabeko bortizkeria, besta horiek «jendarte oso baten gainbeheraren isla bider ehun» direla gaitzetsi du Asanbladak. Haiek, ordea, euskal kulturaren, bizimoduaren eta nortasunaren «erakusle» liratekeen bestak dituzte helburu eta gauzatuko dituzte igandera arte.