Irlen sarea

Durangoko Azoka igaro da, eta Txinaurriak izan da seguruenik bertan saldu den diskorik garrantzitsuenetako bat. Bidehuts artefaktuak -ez baita diskoetxea- Mikel Laboari ikasitako abestiez osatutako diskoa kaleratu du. Talde eta pertsona ezagunek osatutako taldeak berak musikatuak. Garrantzitsua ez da hori, baizik eta egoerara egokitzeko ahalmena eta gogoa. Egile bakoitza da bere diskoa kudeatzen, egiten, grabatzen eta banatzen duena, baina denek elkarrekin indar handiagoa ematen diote ekimenari. Bitartekari asko kendu eta inurri lana eginez, beharbada bakarrik egin ezin zutena posible egin dute.

Gauza hauek egiteko askotan dirua behar izaten da. Euskararen kasuan diru horren parte bat askotan diru laguntzetatik etortzen da. Horrek ere proiektuaren parte bat bete badezake, akats handia izan daiteke horrekiko dependentzia sortzea. Gaur egun, esango nuke arazo larri bilakatu dela. Badira beste era batzuk dohaintzak edo finantzaketa lortzeko.

Gartxot.com animazio filmeko sustatzaileek, adibidez, azokan bertan txistorra pintxo eta pelikularen irudi original bat oparitzen zuten, hamar euroren truke pelikularen nanoekoizle bilakatzeagatik. Interneten ere, Euskaltube bideoak zabaltzeko euskal zerbitzua jendearen dohaintzak eta babesleak bilatzen ari da. Horretarako, webgune berezi baten bidez (http://euskaltube.com/bizirik) dohaintza txiki horiek egiteko aukera ematen dute.

Denak inurri lanak, baina ekimenak ateratzeko era berrietan pentsatzen hasi behar dugula erakusten digutenak. Beharbada, hemendik aurrera gure diru sarreren %10-15norberarentzat interesgarriak diren eta beharra duten proiektuetarako eman beharko genuke. Software libreko proiektuen artean honelako ideiak zabaldu izan dira; ideia bera da, baina arlo gehiagotara zabalduta. Horrekin batera, musulmanek tradizioz dirua elkarri uzteko hawalla duten moduan, guk ere konfiantzan oinarritutako eredu berriak sortu beharko genituzke. Teknologia gure alde dugu, Goteo (http://tinyurl.com/ goteo-youcoop) mikrodohaintzak egiteko tresnak erakusten digu jada hori egitea posible dela. Honi izen bat bilatu, eta zabaldu beharreko zerbait dela uste dut. Gure geroko proiektuak bermatzeko era bakarra inurri lan hau izan daiteke eta. berriketan.info/gorkajulio