Ez da Iruñea, eta ez da Euskalerria Irratia, baina egoerak baditu antzak eta aldeak. Hala Bedi Irratiak 30 urte baino gehiago daramatza lanean Gasteizen, Araba osorako, eta, oraindik ere, lizentziarik gabe dago. Egoera salatzera joan dira irratiaren ordezkariak gaur goizean Eusko Legebiltzarrera, eta legebiltzarkideei esan diete Eusko Jaurlaritzari eskatzeko «irrati komunitarien presentzia bermatuko duen lehiaketa berria» abiatzeko, 2012ko lizentzia banaketa egiteko prozesuan gertaturiko irregulartasunak ikertzeko, eta euskarazko Halabedi2 irratiari behin behinean emaniko lizentzia behin betiko emateko.
Ainhoa Villaverde Hala Bedi irratiko ordezkaria mintzatu da batzordean legebiltzarkideen aurrean.
2012an egin zuten lehiaketa lizentziak banatzeko. Esleipenetan gertaturiko irregulartasunak gogoratu dizkie Villaverdek ordezkari politikoei. Patxi Lopezen gobernuak utzi zuen bertan behera esleipena, eta, geroztik, Lakuan agintean izan direnek ez dute afera konpondu. Prozesuak irrati komunitarioari ekarriko kalteen berri eman die Villaverdek legebiltzarkideei.
