Bilbotarrek alde egiten dutenean, bisitariak entretenitzeko, Kaleszena jaialdia antolatzen du urtero Bilboko Udalak. Gaurtik igandera arte, antzerkiak, zirkuak, clown-ek eta musika emanaldiek alaituko dituzte hiriko kaleak.
Plaza Barria eta Arriaga plaza, Ertzilla eta Garcia Rivero kaleak izango dira ikuskizunon agertokiak.
Gaur, 18:00etan hasita, Frantziako Cie Kiroul taldea arituko da, Les oizeaux crashent pour mourir (sic) ikuskizunarekin; clown bikoteak hainbat hizkuntzatan antzezten du lana. Gero, Italiako Envol Distratto konpainiak umorez beteriko Beltxargen aintzira lana aurkeztuko du. Azkena Espainiako Hiltoff taldea izango da, Radio Salmonela ikuskizunarekin. Zirika Zirkusek egingo ditu artistok aurkezteko lanak.
Eguna musika eta dantza ikuskizun batekin amaituko da: Korrontzi eta Oinkari taldeek Infernuko hauspoa ikuskizuna taularatuko dute.
Nabarmentzekoak dira Kataluniako Always Drinking Marching Band taldearen musika saioak, larunbatean, eta egun berean Deabru Beltzak eskainiko duen emanaldia. The Wolves (otsoak) ikuskizunaren jendaurreko entseguaz gozatu ahalko da, 21:00etan, Arriaga plazan.
KALESZENA JAIALDIA
Noiz. Gaurtik igandera arte.
Non. Bilbon.
Kaleko arteen jaialdia Bilbon
Udaberriko oporrekin, antzerkiak, zirkuak eta musika ikuskizunek hartuko dituzte karrikak, igandera arte
Iruzkinak
Ez dago iruzkinik
Ordenatu
