Kazetariekin mahai inguru politikoak izango dira aurten Info7 irratian

Informazioa eta analisia oinarri hartuta, goizak indartuko ditu denboraldi honetan Info7 irratiak. Hainbat saio berri egingo dituzte. Horrez gain, mahai inguru politikoak izango dira entzungai Kalegorrian irratsaioan.

Honatx denboraldiko berrikuntza nabarmenenak:

'Kalegorrian' saioa

07:30ean albistegi nagusia zuzenduko du Jon Mikel Fernandezek. Ondoren, elkarrizketa politikoaren eta analisiaren tartea izango da, 08:10ean. Astearteetan mahai inguru politikoa izango da.Hego Euskal Herriko gaur- gaurko gaiak ardatz hartuta ariko dira mahaiaren bueltan Mariano Ferrer, Fermin Munarriz (Gara), Martxelo Otamendi (BERRIA) eta Joseba Santamaria (Diario de Noticias) kazetariak. Ipar Euskal Herriko gaiei buruzko mahai inguruak aurten ere izango dira, eta Maite Ubiria (Kazeta.info), Aitor Renteria (BERRIA) eta Allande Boutin (France3) kazetarien eskutik egingo dira ostiraletan.

'Hitzen lihoa' saioa

Doltza Barandiaran kazetariak zuzenduko du saio berria, eta goizeko bigarren zatian (10:00-12:00) emango dute, astelehenetik ostiralera. Gipuzkoako Bertsolari Txapelketak, esaterako, astean behin izango du tartea; idazle eskolako ikasleek ere astean behin bisitatuko dute saioa, sexologiak, genero berdintasunak eta tertuliak bezalaxe.

'Egunari begi kolpea'

Egunak ekarriko digunari begira jarriko dira 09:30etik 10:00etara. Mobilizazioak eta prentsaurrekoak, kontzertuak, errepide istripuak edota eguraldiaren berri emango dute. Astelehenetan, horoskopoari begira ere jarriko da Info7ko igarlea.

Albiste zerbitzuak

30 minutuko hiru albistegi nagusi izango dira: 07:30ean, 13:30ean eta 20:00etan. Horrez gainera, egun osoan, 08:00etan hasi eta 20:00ak bitarte, euskarazko albiste zerbitzuak emango dituzte orduetan. Goizean, berriz, 07:30etik 12:30era, gaztelaniazko albiste zerbitzuekin jarraituko dute.

'Jokoa bai' saioa

Agin Rezola kazetariak gidatuko duen kirol saioak aurrera jarraituko du, baina ordutegi aldaketarekin. 14:00etatik 15:00etara izango da hemendik aurrera, astelehenetan.

'Sartudalapurra' saioa

Ion Olanok gidatutako kultur saioak ere ordutegi aldaketa izango du. 19:30etik 20:00etara ariko da Olano lapurren gordelekutik, astelehenetik ostiralera.

'Ilargi argitan'

Mari Belauntzak zuzenduko du saio berria. Bere moduko «sorginak» izango ditu lagun, musika eta bitxikeriak hizpide hartuta. Astean behin izango da, eta ordubeteko saio hori azaroan hasiko da.

'Uhaina bikaina'

Itsasoari begira jarriko da Aritz Larrañaga hilean behin. Surfaren inguruko albisteak, erreportajeak eta elkarrizketak izango dira.

'Baserritik mundua'

Baserri mundua izango du aztergai Patxi Gaztelumendik, astean behin, ordubeteko saioan. Nekazaritza iraunkorra eta elikadura burujabetzaren berri emango du.