Kometez estaliko da zerua

Estilo, tamaina eta mota askotako kometek estaliko dute Arabako zerua asteburuan. Izan ere, Nazioarteko Lau Haizetara Kometa Jaialdia ospatuko dute Arabako Garaio parkean, Uribarri Ganboa urtegiaren alboan. Lau Haizetara Arabako Kometazale Elkarteak hamalaugarren aldiz antolatu du ekitaldia, eta 200 lagun inguruk parte hartuko dute.

Gasteiztik hamabost kilometrotara dago Garaio parkea, Barrundia udalerrian.

Hainbat ekitaldi eta tailer izango dira larunbatean eta igandean. Eguraldia erabakigarriaizango da jaialdia egoki egiteko. Hala ere, antolatzaileak aurreikuspenak hobetuko diren itxaropentsu agertu dira.

Kometazaleen kometez gain, hainbat herrialdetatik etorritako profesionalen hegaldiak ere ikusi ahal izango dituzte Garaio parkean biltzen direnek.

Goizeko zortzietan hasiko da jaialdia larunbatean. Parte hartzaileak iritsi ahala hasiko dira erakustaldiekin. Arratsaldeko azken ordura arte izango dira ekitaldiak.

Hainbat estilotako erakustaldiak jarraitu ahal izango dira Garaio parkeko zeruan: kometa estatikoak, free-style, ballet, buggy jauziak, fly-surf, borrokak... Horrez gain, kometak egin eta kometak hegan eginarazteko ikastaroak izango dira egun osoan. Guztira, 500 kometa egingo dituzte.

Bake mezuak

Kometa Jaialdia bakerako eta ingurumenaren alderako nazioarteko hegaldiarekin bat dator aurten. Ondorioz, igandean, zeru bat, mundu bat lelopean nazioarteko kometen hegaldia egingo dute, bakearen aldeko zeinu gisa. Bakearen aldeko mezuak izango dituzte zeruan astinduko dituzten kometek.

Jaialdian parte hartuko duten talde guztiek ekitaldi berezia egingo dute 13:00etan: jaialdiaren oroitzapenerako kometa zuriajarriko dute hegan. Asteburu osoan, nahi duen orok bere bake mezua idazteko aukera izango du kometa horretan.

Larunbatean egin bezala,igandean ere hainbat estilotako kometa erakustaldiak egingo dituzte.

Horrez gain, asteburu osoan gaztelu puzgarriak, musika eta beste hainbat ekitaldi izango dira.

NAZIOARTEKO KOMETEN LAU HAIZETARA JAIALDIA

Zer. Kometa ikuskizunak, musika, tailerrak...

Non. Arabako Garaio parkean.

Noiz. Larunbatean eta igandean.