KOMUNIKAZIOA. Xorroxin irratia Internet bidez entzun daiteke

Baztan, Malerreka eta Bortziriak eskualdeez gain, mundu zabalean entzun daiteke jada Xorroxin irratiaren zuzeneko emanaldia. Duela egun batzuk jarri dute martxan irratiaren webgune berritua: www.xorroxinirratia.info. Fernando Anbustegik azaldu duenez, garai batean entzun zitekeen irratia Internet bidez, «baina oraingo webgunean txukunago dago, eta sarean emititzeko prestatua dago». Horrez gain, elkarrizketa batzuk jartzen dituzte webgunean.

Irratia bere eremutik kanpo entzun ahal izatea aberasgarria da proiektuarentzat. «Bitxikeritzat jo dezakegu, esate baterako, gure lehiaketetan entzule batzuek Kanariar Uharteetatik ari direla parte hartzen».