Liluratzeko mokaduak

Tentu handiz eta mimoz ari da Jesus Iñigo sukaldaria aparra koilararekin hartu, eta aurrean duen pintxoaren gainean jartzen. Kontzentrazio eta tentsio aurpegi izugarriarekin, zereginean bizitza jokatuko balu bezala. Behin lana amaituta, harro begiratu dio egin berri duen antxoa pintxo bereziari. Bere ahaleginak hiru edo lau mokadutan liluratzeko gaitasuna izan behar du. Esponja antxoa izeneko pintxo horrek irabazi zuen atzo Hondarribia Euskadi Goza Ezazu pintxo txapelketa. Nerea Sistiaga eta Jesus Iñigo sukaldariek egin zuten, Uharteko (Nafarroa) Abako tabernakoek. Josean Merino Gasteizko Marmitaco tabernariak lortu zuen bigarren saria Ahatea eta baratzea pintxoarekin, eta Darran Williamsonek hirugarrena Oktoberfest-ekin. Bilboko Bitoque de Albia tabernako kidea da Williamson.

«Euskal Herrian oso gustukoa den jakia da antxoa, eta horregatik erabili dugu osagai nagusi gisa. Ogia, tomatea, baratxuri olioa, gazta eta oreganoa ere badaramatza, eta baratxuriaren haizea gehitu diogu», azaldu du Nerea Sistiagak. Ogiaren ehundura urtsua da pintxoaren ezaugarririk aipagarriena, sarituen arabera. Oso hunkituta eta pozik agertu da bikotea. «Urduri egon gara. Etxean tresna gehiagorekin lan egitera ohituta gaude, baina merezi izan du ahaleginak». 3.000 euro eta txapela eraman dituzte etxera. Baita 96 litro garagardo ere. Edari horrekin hobekien egokitzen zen pintxoak sari berezia zuen: sukaldariaren pisua garagardo litrotan.

Martin Berasategi epaimahaiaren lehendakariak aurtengo pintxoen kalitatea goraipatu du. «Harrituta geratu naiz. Gazte askok parte hartu dute, eta sukaldaritzaren geroa ziurtatuta dago. Iruditzen zait datozen belaunaldi berriek gainditu egingo dutela guk oinordetzan utzi diegun ofizioaren maila».

Hondarribiako Itsas Etxeko auditoriuma sukalde inprobisatu bilakatu da aste honetan. Ia 80 pintxoren artean hamar iritsi dira finalera, eta oholtza gainean, zuzenean, erakutsi dute sukaldariek nola egiten dituzten artelan txiki horiek. Denbora mugatu baten barruan prestatu behar izan dute pintxoa; azkar, baina zorroztasun handiz. Azterketa batek ematen duen tentsioa sumatzen da giroan, eta aurkezlearen azalpenek bakarrik apurtzen dute isiltasuna, tarteka.

«Kontuz, aparra erori egiten dela!», ohartarazi diete zerbitzariei. Sukaldariak lana amaitu ondoren, pintxoak oholtzatik behera epaimahaiko kideei eramateko ardura duten bost edo sei gazte dira zerbitzariak, Donostiako Cebank sukaldaritza eskolako ikasleak. Nahiko lan badute ibiltzen ari direla pintxoari zutik eusten. «Epaimahaikoek jan ez dituzten soberakinak probatzeko aukera izango dugu gero sukaldean», dio Pello Orbeak pozik.

Monet inspirazio iturri

Epaimahaikoek hiru mokadutan hunkituta geratzeko inspirazioa edonon bilatu dute. Josean Merinok, adibidez, —bigarren geratu da— Monet margolariarengana jo du: «Sukaldaritzarekiko zaletasun handia zuen, eta koaderno batzuk egin zituen errezetekin». Pintxoa da sukaldaritza modurik zailena, Merinoren aburuz. «Hiru mokadutan nahi duzun guztia adierazi behar duzu. Are gehiago, jaten ari dena gehiagorako gogoarekin utzi behar da».