Informatika eta teknologia berrien alorrean Euskal Herrian egiten den topaketarik handiena eta Europako bigarrena da Euskal Encounter. Aurten ere marka guztiak hausten ari da: inoiz baino jendetsuagoa izaten ari da; inoiz baino esparru handiagoa hartzen du —35.000 metro kuadro baino gehiago—; iaz baino egun bat gehiago iraungo du —astelehenean amaituko da, 17:00etan—; eta konexioa ere inoiz baino azkarragoa da, segundoko 40 Gb simetrikoa, hots, datuak bidaltzeko 40 giga, eta datuak eskuratzeko beste 40.
Sabino San Vicente Euskal Encounterren antolatzaile taldekoak BERRIAri adierazi dionez, pozik daude orain arte lortutakoarekin: "Ostiralean zabaldu genuen topaketa, eta dena oso ondo joan zen; esperientziaz dakigu horrek esan nahi duela teknikoki behintzat dena ondo joango dela amaitu arte".
Hasieran, informatikan adituak eta arlo horretako profesionalak biltzen ziren Euskal Encounterren; orain, informatika zaleak eta, batez ere, bideojokoak gogoko dituztenak ere batzen dira topaketara. "Informatika oso zabala da", azaldu du San Vicentek, "eta hemen bidejokoen zaleak biltzen dira, baina diseinua gogoko dutenak, ordenagailuaren bidez musika egiten dutenak eta bestelakoak ere etortzen dira. Nik uste dut horixe dela Euskal Encounterrera etortzeko motibaziorik handiena: jendeak badaki antzeko interes eta zaletasunak dituzten lagunekin topo egingo dutela, eta hona datoz harremanak egitera, gauzak partekatzera eta ikastera".
Ordenagailua komexio oso azkarrarekin erabiltzeko aukeraz batera, Euskal Encounterrek 20 bat hitzaldi, beste horrenbeste tailer, erakusketak, lehiaketak eta bestelako jarduerak ere eskaintzen ditu.
