Internetek krisia ekarri die musika konpainiei, baina aukera berriak eskura jarri diete euren musika zabaldu nahi dutenei zein aberasteko asmorik gabe musika argitaratzen duten elkarteei. Taldeotako ordezkariak eta entzuleak elkartuko dira gaur Donostian, Interneten aroko musikagintzaren inguruan elkarren esperientziatik ikasteko. Buenawista Prollecziom's elkarteak antolatu du Musikagela Weekend jardunaldi irekia.
Gaur, 10:00etan,egile eskubideen inguruan mintzatuko da Jorge Campanillas abokatua. Informazio teknologietan aditua da, eta Creative Commons zein Copyleft lizentziak zer diren eta horietako bakoitza erabiltzearen abantailak azalduko ditu.
Internetek musika zabaltzeko eskaintzen dituen aukeren berri emango du David Garcia Aristegik. P2P sareak eta Streaming sistemak nola erabiltzen diren eta eskaintzen dituzten negozio ereduak argituko ditu, eta horretarako enpresak nola sortu azalduko du.
17:30etik aurrera, Netlabelak, hau da, Interneteko diskoetxeak nola egiten duen lan kontatuko dute.
Ondoren, mahai-ingurua egingo dute artistek eta ekoizleek gaurko egoeraren inguruan. 21:00etan kontzertua emango dute Sabur, Ydilia, Melmac eta Polaroid taldeek (doan).
MUSIKAGELA WEEKEND
Noiz. Gaur, 10:00etan.
Non. Egia kultur etxean, Donostian.
Musikagintza molde berriak
Aberasteko asmorik ez duten musika elkarteen bilkura egingo dute gaur Donostian, Musikagela Weekend jaialdian
Iruzkinak
Ez dago iruzkinik
Ordenatu
