Parrandarako lau egun gozo

Gaur hasi eta igandera arte eguneroko kezkak eta betebeharrak ahazteko eta festan murgiltzeko aukera izanen dute Antsoainen (Nafarroa). Eguraldi ona lagun, herritarrei festez gozatzeko gonbita egin die Arantxa Biurrun kultura zinegotziak.

Gaur jaurtiko dute txupinazoa Antsoainen, 18:00etan. Festei hasiera emateko lana herriko Erraldoien eta Buruhandien Konpartsari egokitu zaio. Konpartsako kide guztien izenean, Iñaki Flamarikek jaurtiko du suziria. Antsoaingo konpartsak hamahiru urte daramatza festak alaitzen herrian, eta urteotan guztiotan egin duen lan eskerga eskertu nahi izan du udalak. «Pozik gaude aukerarekin. Gure lana onartzen dutela esan nahi du horrek», dio Andoni La Haba konpartsako arduradunak.

Lana eta parranda uztartzeko prest dira konpartsako kideak, eta festak dantzan hasiko dituzte. Udaletxeko balkoitik suziria bota eta gero, erraldoiak dantzatzera jaitsiko dira plazara. Joan den urtean Antsoaingo gaiteroek konpartsarentzat espresuki sortutako Ezkabako jota dantzatuko dute, plazan. Ondoren, ohiko ibilbideari ekinen diote.

Txupinazoaren ondotik, musika eta dantza nagusituko dira Antsoaingo kaleetan. Erraldoi eta Buruhandien Konpartsarekin ibili nahi ez duenak baditu beste aukera batzuk. Zazpietan, euskal dantzak eskainiko ditu herriko dantzari txikien taldeak plaza Berrian. Ondoren, dantzaldia izanen da gaiteroekin eta txistulariekin, eta haurrentzako entzierroa Zelaia parkean. Ordu berean baina Rafael Alberti plazan, Joselu Anaiak taldeak kontzertua emango du. Gaueko hamaiketan, berriz, herri mugimenduek antolatuta, mozorro eta playback lehiaketak eginen dira txosnetan.

Hurrengo igandera arte izanen da non gozatu Antsoainen. Egunero, kontzertuak izanen dira txosnetan. Bihar, Egurre, Siroko eta Betagarri taldeek joko dute, 23:00etan. Etzi, berriz, Tximeleta taldeak dantzaldia eskainiko du gauerdian. Festen azken egunerako, iraunkortasunaren azoka antolatu du Agenda 21 taldeak: Zelaia parkean izanen da, 10:30ean.