The Woman Who Read Too Much eleberriaren gaztelerazko bertsioa aurkeztuko du gaur Donostian Bahiji Nakhjavani idazle persiarrak, eta, bidez batez, emakumeek Iranen eta oro har Ekialde Hurbilean duten egoeraz mintzatuko da entzuleekin.
Irandik ihes egin behar izan zuen familiarekin txikitan, gurasoak baha'i erlijioaren jarraitzaileak zirelako. Horren ondorioz, Ugandan hazi zen, eta Erresuma Batuko eta Ameriketako Estatu Batuetako unibertsitateetan ikasi zuen. Europako eta AEBetako literatura irakatsi zuen Belgikan, eta egunotan Frantzian dabil irakasle.
The Woman Who Read Too Much haren hirugarren eleberria da. Aurreko biak bezala, XIX. mendean dago girotua, eta Tahiri Kurratu'l-Ain poeta eta irakaslearen istorioa kontatzen du. Pertsonaia historiko bat da, eta erlijio askatasunaren zein emakumeen berdintasunaren aldeko borrokaren ikurra da Ekialde Hurbilean. Izan ere, gizonen asanblea baten aurrean beloa kentzen ausartu zen. Teheranen exekutatu zuten, 1852.ean.
Nakhjavaniren lehen eleberria —The Saddlebag— nazioarteko best-seller-a izan zen. Idazleak dokumentalen gidoiak sortu ditu, eta Persiako artearen eta baha'i erlijioaren inguruko hitzaldiak ematen ditu munduan barrena.
BAHIJI NAKHJAVANI
Noiz. Gaur, 18:30ean.
Non. Bilboko Elkar aretoan (Poza Lizentziaduna, 14,Zazpikaleetan).
Persiako emakumeen hitzak
Irango eta, oro har, Ekialde Hurbileko emakumeen egoeraz mintzatuko da Bahiji Nakhjavani idazlea
Iruzkinak
Ez dago iruzkinik
Ordenatu
