'Saerichnites Abruptus', duela 49 milioi urteko icnofosila Zumaian

Zumaiko flyschak gordetzen zuen altxor handienetakoa da: duela 49 milioi urteko icnofosila. Asier Hilario Deba-Zumaia biotopoaren zientzia zuzendariak eta beste aditu batzuek duela zazpi urte aurkitu zuten. Saerichnites Abruptus izakiak arrokan utzitako arrastoa arriskuan zen, ordea, Itzurungo hondartzako labarrean. Itsaso kolpe batek eraman zezakeen. Horregatik, fosila gordetzen duen arroka-pieza labarretik atera, eta Algorriko interpretazio zentrora eraman dute. Arrastoa 1,5 metro luze da, eta 3 zentimetro zabalean. Munduan ez da ezagutzen izaki horren fosil hoberik.