Urrea, berriz Valentziara

Pirofantasia su etxeak (Valentzia, Herrialde Katalanak) irabazi du aurtengo urrezko maskorra, eta 7.000 euro jasoko ditu. Atzo egin zuten Su Artifizialen 49. Nazioarteko Lehiaketaren sari banaketa, Londres hotelean, eta han jakinarazi zuten epaimahaiaren erabakia. Zazpi su etxek parte hartu dute lehiaketan.

Joan den asteazkenean bota zituen suak Pirofantasiak. Nerea Txapartegi epaimahaikidearen esanetan, su bilduma batek eduki behar dituen osagai guztiak izan zituen ikuskizunak. «Kolore oso bereziak eta zailak ikusi genituen, laranja esaterako; espazioa oso ondo erabili zuten, hotsa etengabea izan zen, erritmoa egokia, eta bukaera izugarria».

Zilarrezko maskorra, berriz, Italiako Lieto Fireworks su etxeari eman diote, «nortasun napoliarrari fidelak» izan direlako eta «kalitate handiko materiala» erabili dutelako. Joan den igandean bota zituen suak Lieto fireworks su etxeak, abuztuaren 12an. Saritzat, 5.250 euro jasoko ditu.

Azkenik, epaimahai ofizialak Frantziako Intermede su etxeari eman dizkio brontzezko maskorra eta sariari dagozkion 3.500 euroak. «Bilduma dotorea iruditu zaigu», adierazi zuen Txapartegik. «Material gutxi erabilita ere, ongi jakin dute kudeatzen». Intermedek asteartean bota zituen suak.

Gazteen epaimahaiak, bestalde, Caballer Fx su etxeari (Valentzia, Herrialde Katalanak) eman dio saria, iaz urrezko maskorra irabazi zuenari. Ostiralean bota zituen suak Caballer Fx su etxeak. Itsaso Etxabe izan zen epaimahaikideen bozeramailea, eta, haren esanetan, ostiraleko ikuskizunaren erritmoa, koloreak eta argitasuna hartu dituzte kontuan erabakia hartzeko. Altuera ezberdineko suak ongi nahastu izana ere baloratu dute.

Txapartegiren hitzetan, belaunaldi aldaketa ari da izaten irabazleen artean, aurtengo irabazleak aurreko urteetakoak baino gazteagoak baitira. Bestalde, aurtengoa «kalitate onekoa» izan dela nabarmendu zuen.