URREZKO DANBORRA JASO DU XABI ALONSOK

Xabi Alonso Real Madrileko jokalariak jaso zuen atzo arratsaldean Donostiako Urrezko Danborra, hiriak ematen duen aitorpenik handiena. Udaletxeko bilkura aretoan jaso zuen saria Alonsok, Odon Elorza Donostiako alkatearen eskutik. Danbor hotsek ez zuten etenik izan ekitaldian, San Sebastian martxa joaz ireki baitzuten ekitaldia. Jarraian, Jon Maiak aurreskua dantzatu zion omenduari. Sariarengatik eskerrak eman, eta bizitzan jaso duen «berezienetariko» bat dela aitortu zuen Alonsok. Urrezko Danborraren ekitaldia egun bat aurreratu behar izan zuten, Tolosako erdilariak Espainiako Kopako partida jokatu behar baitu gaur. Ondorioz, ekitaldien egutegia aldatu behar izan dute. Herritarren merituaren dominak San Sebastian bezperan ematen badira ere, gaur banatuko dituzte.