Gasteizko kaleak jaietan daude jadanik. Arratsaldeko seietan, puntu-puntuan, hasi du hegaldia Zeledonek San Migelgo dorretik, sei eguneko ospakizunei hasiera emateko. Gaztei errugbi klubeko eta Araski emakumezkoen saskibaloi klubeko ordezkariek jaurti dute jaiei hasiera eman dien suziria.
Hamabi minutu inguru behar izan ditu Zeledonek San Migelgo kanpandorretik jaitsi, eta jendez lepo zegoen plaza zeharkatzeko. Behin San Migelgo balkoian jaietarako deia egin die bertaratutako guztiei. Zeledonen abestia gazteleraz eta euskaraz abestu ditu, eta Arabako kirol taldeen denboraldi ona gogora ekarri. Azkenik ondo pasatzeko deia egin die jaietan egongo diren guztiei, eta eraso sexisten aurkako aldarria egin du. “Ez ezetz da, beti!”, oihukatu du balkoitik.
Plazan milaka lagun bildu dira. Hamaika aldarrikapen ikusi dira bertan: TTIP eta NATOren aurkako aldarria, euskal presoak etxean egotearen aldekoak... Irudi handienetako bat autodefentsa feministaren aldekoa izan da, San Ferminen jaien hasieran ikusi ahal izan zen bera.
