Zigarreta elektronikoak debekatzeko aukeraz mintzatzen hasi da Donald Trump AEBetako presidentea. Gerta daiteke halako larrialdirik Euskal Herrian? BERRIAk erreportajea argitaratuko du gai horren inguruan bihar. Europan kontrolak askoz zorrotzagoak direla esan dute adituek, baina hemen ere zigarreta elektronikoek nerabeen artean duten arrakastaz ohartarazi dute.
Horrez gain, Seaskak Angelun (Lapurdi) aisialdian ere euskaraz egin daitekeela erakusteko iganderako antolatu duen jaia azalduko du Nagore Arinek Bizigiro atalean. David Fincherren Mindhunter telesailaren itzulera aztertuko du Mikel Yarza Artolak, eta James Grayren Ad Astra filmaren nondik norakoen berri emango du Gontzal Agotek.
Gorbeiako parke naturalak 25 urte bete ditu, eta ospatzeko ekitaldiak antolatu dituztela kontatuko du Amaia Ramirez de Okariz Kortabarriak.
