Berria.infoko blog komunitatea

Login

Teknokrazia

tecnos Vs. kratos

2009-02-27

Permalink internet, 373 hitz  

Politikera

Ingelesez "Political era"k "Aro politikoa" esan nahi du. Baina, ez... hizkuntza politikoaz ari naiz, politikeraz. Lengoaia ezberdinak erabiliz egiten den politikaz, baita hizkuntza ezberdinetan ere. Eta zer eman du hautes-kanpaina honek Interneten euskarari dagokionean? Has nadin...

Joan diren egunetan aipatu dut Hamahiru blogean alderdi eta hautagaien webguneek euskarari eskaintzen dioten trataerari buruzko irakurgaia argitaratu zuela Mikelek. Oraingoan, bada, mundu digitaletik "analogikora" salto egin, eta beste hausnarketa batekin itzuli zaigu ziberespaziora.

Etxeko postontzian jasotako paperezko propaganda ("Spam analogiko hori") aztertu du hiru ikuspegi nagusitatik: kopurua, hizkuntza eta dirua.

Sustatuk, halaber, CISen inkestan agertzen diren euskararen inguruko datuen azterketa plazaratu du, Betiri izeneko erabiltzaile baten begirada zorrotzari esker. Inkestari erantzun dioten lagunen aukera politikoa eta hizkuntza alderatzen dira bertan.


Argazkiak.org | CIS euskara eta alderdiak © cc-by-sa: sustatu

Euskararen Gizarte Erakundeen Kontseiluak, bestetik, alderdien hautes-egitarauetan euskararekin zer ikusia duten gaiak "Hizkuntza Politika Indartu eta Garatzeko Hamar Proposamen"en ikuspegitik. Alderdi guztiak aztertu ditu, aurkezteko aukera ukatu zaienak izan ezik, ezinezkoa izan baitzaie hautes-egitarau horiek eskuratzea. Kontseiluaren aburuz, alderdiek proposamen ausartagoak egin beharko lituzkete, Unescoren Atlasak agerian uzten duen egoera zaurgarria gainditu nahi badute.


Esan behar dut, euskal blogosferak partehartze sozialaren ikuspegitik oso erantzun interesgarria eman duela hauteskunde kanpaina honetan. Ez nuen blog hau politikariek bozkak eskuratzeko Internet nola erabiltzen duten kontatzeko soilik erabili nahi. Alderdien jardunaren aurrean gizarteak nola erantzuten duen ere islatu nahi nuen. Kontatzeko, baina, lehenengo gertatu behar. Eta gertatu da, hasieran izan nuen irudipenaren kontra.

Euskal blogosferak aktiboki parte hartu du hauteskunde kanpainan. Ziberekintzaile izan da. Beste medioetan agertzen ez den informazioa azaleratu du, batzuetan "scoop" ezaugarriak ere izan dituztela esango nuke, nolabait. Elkarrizketak izan dira, apelazio zuzenak, azterketa sakonak eta bitxikeria ezberdinak. Niri, bederen, jateko ugari eman dit, ez naiz gosez geratu. Euskarazko herri kazetaritza izan da iturri nagusietako bat. Eta kanpaina hau ditxosozko 2.0 izan bada, horri esker izan da, ez beste ezer dela-eta.

Baretutako otsoaren blogean Patxi Lopezen iragan dantzaria deskubritu didate, eta Dantzan.com webgunean kulturaren, dantzaren eta folklorearen ikuspegitik aztertu dituzte hautes-egitarauak. Ibarretxek software librearen inguruan (gobernuarentzat lan egiten duen Interneteko komunikazio enpresa batek ondo aholkatuta, esango nuke) erantzun ere egin dio herritar baten galderari. Beste alderdi batzuek ez bezala, EAJk ez baitzuen erantzun Softwarelibaenahidugu.org elkartearen galdetegia.


Argazkiak.org | Patxi Lopezen propaganda 03 © cc-by-sa: xa2

2009-02-26

Permalink internet, 372 hitz  

Paperak galdu gabe

Azken txanpara iritsi da EAEko hauteskunde kanpaina, eta Interneten ere martxa handitu du azken egunotan. Inkesta, prospektiba, apustu eta bestelako espekulazioak nagusitu dira, eta gustu guztietakoak aurki daitezke sarean.

Sustatu.com webgune berrituan, D3Mren bozkak kontuan hartzen dituen kalkulagailua abiatu dute. Eta simulazio interesgarria ere plazaratu dute, Legebiltzarrerako 2005eko emaitzak oinarri hartuta.

2005eko emaitzakEHAK legez kanporatu izan balute

Sarean, baina, zehaztasun gabeko bestelako irakurketa bat ari da dantzan eposta batetik bestera, bolo-bolo. Ezker abertzaleko baliogabetutako bozkak Parlamentuan nola banatuko diren azaltzen du, hautesle horien erabakia aldatu nahian. Papeleta mutantearen istorioa...


Kanpaina honetan paperak galdu ez dituenik bada, hori Demokrazia 3 Milioi alderdia da. Legez kanporatu badute ere, sarean jarri ditu papeletak eskuragarri, eta Baltasar Garzon epaileak agindua eman bazuen ere, oraindik on-line dago. Egunotan itxiko balute, Indymedian ere daude eskuragarri eta, harrigarriagoa dirudiena: Libertad Digital agerkari elektroniko eskuindarrean ere daude deskargatzeko moduan.

Alianzo enpresaren Eleccionesvascas webguneak ezohiko inkesta plazaratu du, eta emaitza oso ezberdinak ateraten dira. Zein alderdi politiko bozkatuko duzun galdetu beharrean, zeure sinismen politikoen inguruko itaunak erantzun behar dituzu. Inkestak berak esaten dizu islatu duzun jarreragatik zein alderdi dagokizun. Eta emaitza bitxia da benetan.

Eleccionesvascas

Hau guztia interneten lau haizetara zabaltzen ari den bitartean, hautes-legeak egun oraindik debekatu egiten du "hausnarketa egunean" zundaketak argitaratzea. Eta sarean ere eztabaida piztu da, Interneten aroan inolako logikarik ez duelako. Berria egunkariak berak, une honetan, badu inkesta bat abian: "Zeinek egin du kanpainarik onena?".

Mundu birtualak jarraipena izan ohi du mundu fisikoan. Eta Politika 2.0 ekimenekoek "Aurreko eguna" antolatu dute, besteak beste hauteskundeak eta Interneten arteko harremanaz hitz egiteko. Aurkeztu ahal izan duten alderdien kanpainen alor ezberdinak sarituko duen ekitaldia ere izango da, "Gala politikoa" edo. Hauek dira kategoriak: Lelo Saria, Kartel Saria, Bideo Saria, Web Saria, Irrati Saria, Estilismo Saria, Sari Berezia.

Artean, bi bideok bereganatu dute nire arreta. Horietako batean Ibarretxe ageri da Buenafuentek egin ei zion galdera bati erantzunez. Zenbat ordaintzen duzu kafea? Bada, lehendakari eta lehendakarigaiak euskaraz erantzun zuenean 1,30 euro balio zituen eta erdaraz, berriz, 1,35... Merkeago nire ama hizkuntzan!

Azken buruan, bideo honek EAJko hautagaiarekin hainbeste landu den izaera "humanoa" indartzen duela esangon nuke. Nahiz eta erabili dutenek trufarako baliatu nahi izan. Aldiz, Paxi Lopezena omen den irudiak ez dut uste, zabalpen handia izango balu, eragin berdina izango zukeenik.

And the oscar goes to...

2009-02-25

Permalink internet, 493 hitz  

Garamendi lehendakari

Garamendi For Governor

Garamendi Vs. Terminator [kanpaina paraleloa]

Ez, ez naiz datorren igandeko hauteskundeetaz ari. Bitxikeriak ere aipatuko nituela agindu nuen, eta bitxikeria izan daitekeenarekin natorkizue. Izan ere, AEBetako hauteskundeak hain presente ditugun honetan, kanpaina paralelo bat gauzatzen ari da Atlantikoaz bestaldean.

Euskal jatorriko hautagai bat ari da lehian, gainera. John Garamendi, egun Kaliforniako gobernadoreorde da, eta Alderdi Demokrataren primariatako kanpainan murgilduta dago. Arnold Schwarzeneggerri legegintzaldia amaitzen zaio, eta Kaliforniako "term limit" legeek ez diote hirugarrenez aurkezten utziko. Txutxumutxuek diotenez, AEBetako Senaturako hautagaitza aurkez dezake aktore ohiak. Terminator ordeztuko duen hautagai "euskalduna" bilaka daiteke, beraz, Garamendi.

2010eko azaroaren 2an Kaliforniako gobernadorea hautatzeko egingo den bozaldira aurkezteko, ordea, primaria demokratak irabazi beharko ditu, eta inkestetan (2009ko urtarrilaren 22-25) faborito izatetik nahiko urrun ageri da, mementuz. Hautagai bilakatuz gero, ez da Schwarzeneggerrekin zuzenean lehiatuko, haren ordezko hautagai errepublikarrarekin baizik. Baina ezin izan diot Marvel-eko komiki estatubatuar batekoa dirudien goiburu hori jartzeko gogoari eutsi. ;)

Gasteizko Legebiltzarreko hauteskunde kanpainaren Interneteko alderdia aztertzerakoan hasieratik egin diet erreferentzia AEBetan oso erabiliak diren estilo eta teknika komunikatiboei eta Obama efektuari. Garamendiren adibideak hemengo eta hango kanpainaren arteko alderaketa paregabea egiteko aukera eskaini dit, bada.

Garamendi family

Hautagai demokrataren webgunean, dagoeneko hemengo hautagaien eta alderdien webguneetan ikusten ohitu garen elementuak aurki ditzakegu. Eskuineko zutabean, sare sozial ezberdinetako logotipoak eta hautagaiaren kontuetarako estekak ageri dira, baita azkeneko bideoak ere...

Hautagaiaren humanizazioaren adibide asko dago, halaber. Hemen ere gero eta gehiago jorratzen diren bideen ezaugarriak oso nabarmenak dira Garamendiren webgunean (kanpaina egiteko aukera izan dutenen artean, bederen). Bestek beste, AEBetan hain zabaldua dagoen "ohorezko dama"ren figura ageri da, Patti Garamendi (Patricia Wilkinson Garamendi) emaztea ezagutzeko gonbidapena luzatzen baitzaio bisitariari.

Prentsatik hartutako albisteek
osatzen duten informazioari erreparatzen badiogu promesa ugari ikus daitezke, baita bere egungo gobernadoreorde kargutik egindako lorpenen zerrenda ere. Tira, hori ikusteko ez da beharrezkoa Atlantikoaz bestaldera joatea.

Azpimarragarria da AEBetako hauteskunde orotan indar ukaezina duen eragile baten presentzia: $$$. Izan ere, Garamendik bere webgunean kanpainara dohaitza bidez bideratutako diruaren berri ematen du. Euskal Herrian diruak ere alderdien kanpainetan berebiziko garrantzia duenik ezin uka daiteke, noski. Baina AEBetan, hemen ez bezala, kanpainako elementu informatibo bilakatzen da, indar erakusketa gisa edo.

Kanpainarako sortutako webgunea edukiz josia dago, eta denetarik aurki daiteke denbora apur bat hartuta. Edukia baita interneteko marketinaren zutabeetako bat.

Garamendi eta Azkarate

John Garamendiren aitona euskalduna zen. Sam Garamendi lekeitiarraren iloba da Kaliforniako gobernadoreordea. Joan zen mendearen hasieran Ozeano Atlantikoa zeharkatu eta Utah estatuko Ogden hirian jarri zen bizitzen. Nevadara egingo zuen gero, familiarekin, eta gero Kaliforniara. Han jaio zen John, 1945. urtean.

Garamendik badu harremanik EAJrekin eta datorren igandeko hauteskundeen ostean berriz eratuko den Lakuako Gobernuarekin. Miren Azkaraterekin ikus dezakegu AEBetako euskal diasporaren bilkura batean, eta Euskal Herria bisitatu zuen 2007an. Besteren artean, Ibarretxerekin ere bildu zen. EAJren webgunean gobernadoreordetza hauteskundeak irabazi zituen eguneko albistea irakur daiteke.

Informazio erabilgarria:
Arnold_Schwarzenegger Wikipedian
John Garamendiren kanpainaren webgunea
John Garamendi Wikipedian
John Garamendi gobernadoreordearen webgunea
John Garamendi "The New York Times"en
John Garamendi eta Miren Azkarate (North American Basque Organizations)
John Garamendi gobernadoreorde hautatu zuteneko albistea (BERRIA 2006-11-08)
John Garamendi Euskal Herrian

2009-02-24

Permalink internet, 308 hitz  

Nazioarteko begirada

Nazioarteko prentsa irakurketa egin asmo nuen Teknokrazia blogean gaur. Hasi naiz sarean bilatzen, kuxkuxero, eta lehenengo kolpean EAEko hauteskundetarako kanpainak nazioarteko hedabideetan nahiko oihartzun eskasa izan duela iruditu zait.

Nazioarteko prentsaren artean Estatu espainoleko agerkariak dira martxoaren leheneko bozaldiari arreta gehien eskaini diotenak, bistan da. Eta Estatu espainoletik kanpo, Demokrazia 3 Milioi eta Askatasuna alderdien legez kanporatzeari baita ETAk azken asteotan egin dituen erasoei erreparatu diete nagusiki. Gertakari batzuen nahiz besteen larritasunagatik, nahiko logikoa dirudi horrek.

Baina beste zerbaiten bila ari nintzen ni. Kanpainaren irakurketa ezohikoen bila edo, bederen, kanpotik begira ari den so egilearen iritziaren atzetik. Ez dut nire helburua bete-betean lortu, bada.

"Gulf Times"-ek kanpainaren hasierari eskaini dio tarterik. Egin duen irakurketaren arabera, datorren igandeko hauteskundeak krisialdi garaiko froga erabakigarria izango dira Jose Luis Rodriguez Zapaterorentzat. Inkestetako datuak zerrendatzen ditu egunkari honek, eta Galiziako hauteskundeak ere ditu hizpide.

"Euronews"en arabera, Patxi Lopez eta Juan Jose Ibarretxeren arteko lehia gogorra izango da eta, edonork irabazten duela ere, batek nahiz besteak boterea eskuratzeko koalizioa osatu beharko dutela azpimarratu du.

"Economist"ek beste irakurketa bat egin du. Izan ere, PPko ordezkari publikoen ustelkeria kasuak ardatz dituen artikulu batean aipatzen du EAEko hauteskunde kanpaina, "Traidore baten musua bezain garratza den eskandalua" izenburupean.

"Euroweeklynews"ek, bestalde, Alderdi Popularraren espioitza kasuak eta barne tirabirak aipatu ditu. Madrilgo presidente Esperanza Aguirreren hitzak ere jasotzen ditu. Haren esanetan, espioitza afera honen azaleratzearen bitartez alderdiaren irudia kaltetu nahi izn baitute EAEko eta Galizako hauteskundeei begira.

"Expatica" agerkariak antzerako ikuspegia plazaratu du, eta gaineratu du hauteskundeok Mariano Rajoyk bere alderdian duen agintearen frogabidea izango direla.

"Canoe" agerkari elektronikoak Quebec eta Euskal Herriaren arteko alderaketa egin du eta aurtengo hautes-lehia gogorra izango dela ere iragarri du.

Agence Bretagne Presse
albiste agentziak, azkenik, Parti Breton-eko gazteek EAEko kanpainan parte hartu dutela azpimarratu du. Albistea atontzeko erabilitako argazkietan Ar Vretoned Yaouank-eko kideak ageri dira Ibarretxeren kanpainaren momentu ezberdinetan.

2009-02-23

Permalink internet, 451 hitz  

Bideolehia

Lehenago ere aipatu izan dut blog honetan Interneteko hautes-kanpainari dagokionean behintzat bideoa oso euskarri erabilia dela, baita eraginkorrena ere.

Alderdi eta hautagai guztiek baliatu dituzte bideoak sareko kanpaina gauzatzeko. PP alderdia izan da bideo "biral" horietako bat (ahoz-aho hedatzen dena) sareratzen lehenengotarikoa. Tira, bideoa baino gehiago, "Ireki begiak" lelopean argitaratutakoa audioa zen, baina Youtuben jarri zuten ikusgai azpititulu eta guzti. Bertan, telefono dei baten bitartez EAJko militante bilakatzeko egin beharrekoak galdetzen dizkiote alderdiaren Bizkaiko egoitzako arduradunari.

Beste bideo batzuk ere erabili dituzte Basagoitiren hautagaitza indartzeko. Esaterako, nahiko sonatua izan zen PPko hautagaiak bere semeari biberoia ematen zionekoa. Youtubeko bere kanalean ikus daitezke beste batzuk.

Ezker abertzaleak ere baliatu ditu ikusentzunezkoak Interneteko kanpainari begira. Batetik, Demokrazia 3 Milioi hautes-zerrendak Euskaltuben hamaika bideo jarri ditu ikusgai, eta Ezkerabertzalea.info webguneak ere kanal berezia sortu du.

Aralarrek, 2007ko Foru eta Udal hauteskundeetan egin bezala, aurten ere erabili du Euskaltube bere bideoak sareratzeko. Eusko Alkartasunak, ordea, iaz bideo mordoa sareratu zuen plataforma honetan, baina aurten soilik Youtube erabiltzea erabaki du.

Ezker Batuak Ustream zerbitzuaren bitartez Ezker Telebista sortu du, baina mementuz bideo bakarra dago ikusgai.

EAJri dagokionean, EAJ-PNV.tv sortu du, eta hainbat bideo metatu ditu bertan. Bitxikeria gisa esan behar da Euskaltubek asmatutako "Kode enbotatua" terminoa (ingelesezko embed hitzaren itzulpen librea) euskal blogosferan zabaltzen ari dela eta Ibarretxeren alderdiak ere bere egin duela webgune horretan ikus daitekeen legez. Hautagai jeltzaleak, bestalde, bideobloga ere badu bere webgune pertsonalean.

Guztien artean azken urteotan bideobloga gehien elikatu duen eta elikatzen jarraitzen duen hautagaia PSEko Patxi Lopez da. Bere blog pertsonalean bideo ugari dago ikusgai, kanpaina ofizialki hasi ondorengoak, baita lehenagokoak ere.

Alderdi politikoen erakunde gazteak aipatu behar ditut berriz ere. Esaterako, JSE-EGAZ erakundeak txapelketa antolatu du "Hemen denok dugu tokia" lelopean. Irabazleak 300 euro poltsikoratuko ditu, eta telebistek alderdiei eskaintzen dioten hautes-tarteetan emitituko omen da bideoa, iragarri dutenaren arabera.

Bizkaiko EGIk ere kanala du Youtuben, baina bideo bakarra dago ikusgai. PPko gazteek ere sortu dute bideo-kanala, baina bideo jakin batek erdietsi du arrakasta gehien, eta ez dirudi ekoizpen handirik dutenik.

Aralarko gazte erakunde Iratzarrik ere badu kanala Youtuben, baina nahiko produkzio txikia dauka ikusgai.

Gazte Abertzaleek, bere aldetik, "No les dejes..." bideo kanpaina abiatu du. Jakinarazi dutenez, "bideoak ikastola baten inguruan sortu dira, euskal politikagintza umeen jokoa ez dela salatzeko eta gure eskubideen defentsan, Eusko Alkartasunari botoa eskatzeko".

Amaitzeko, hauteskunde kanpainak herritar edo norbanakoengan eragiten dituen erreakzioak izan nahi ditut hizpide. Hori baita Interneteko hautes-kanpainari dagokionean gehien interesatzen zaidan alderdia. Gaurkoan, Koldotxuren txokoan ikusitako bideo bat ekarri nahi izan dut blogera. Izan ere, Ficus baten hautagaitza proposatu du blogariak, Michael Moore zinegileak 2000. urtean egin zuen bezala. Gainera, "Iruzurkundeak" izenburupean hauteskundeen inguruko gogoeta plazaratzen ari da Koldotxu.

PD: Alderdiek erabili dituzten bideo esanguratsu batzuk bildu ditut Euskaltuben, hauteskundeak izeneko erabiltzailearekin.

:: Hurrengo orrialdea >>

Teknokrazia

Haritz Rodriguez kazetariak hautes-kanpainaren interneteko eraginaren berri emango du egunero Teknokrazia blogean.

| Hurrengoak >

Azaroa 2019
Ast Ast Ast Ost Ost Lar Iga
<<  <   >  >>
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30  

Bilaketa

Atalak


Blog hau sindikatu XML

powered by
b2evolution

Valid XHTML 1.0!  Valid CSS!

Valid RSS!  Valid Atom!