Hilabetea: abendua 2017

Bihotz gogorrekoak

Azkenaldian, erosketetako nire zerrendan bakarra da gaia. Eta barkatuko didazue, enegarren aldiz barkatu ere, gaurkoan berriz zerrenda bakar horri tiraka ekiten badiot. Baina kontua da auziak indarrez jo duela nire bihotza.

Eta bai, sentimenduak paratu ditut mahai gainean. Afera honek aspaldi gainditu baitzituen arrazoiaren mugak, eta sentimenduak astindu. Erran nahi baita ez dago arrazoi arrazionalik Nafarroako irakaskuntzan zerrenda bakarra ez ezartzeko. Kontratatzailearen eta kontratatuen aldetik denak izanen bailirateke onurak zerrenda bakarrarekin. Beraz, auzi honetan, sentimenduak sartu dira jokoan: Erregimen Zaharreko alderdiek euskaraz bizi nahi dugunoi diguten gorrotoa batetik, eta Comisiones Obreras sindikatuak babesten dituen irakasle elebakar pribilegiatu batzuen beldur esplikaezina bertzetik.

Azken egunotako jarrera hartzeek argi erakutsi baitute Marisa de Simon eta Jose Miguel Nuin Izquierda – Ezkerrako parlamentariek babestuko duten jarrera Comisiones Obrerasen jarrera dela. Eta gogoratu, Comisiones Obreras Erregimen Zaharreko sindikatutzat jotzen genuen.

Era guztietako ekimenak egin dira De Simonen eta Nuinen bihotzak era batera edo bertzera samurtzeko. Baina, oraingoz, ez da modurik izan. Alde horretatik, antologikoa iruditu zitzaidan abenduaren 14an ELA sindikatuak osatu zuen prentsa ohar bat. Dirudienez, egun hartan Izquierda – Ezkerrako zuzendaritzakoekin batzartu ziren eta zerrenda bakarraren kontra ez egiteko konbentzitzen saiatu ziren. Oharra ez da sobera luzea, baina iradokitzen du ELAkoek hau, eta hori, eta hura, eta hemengoa, eta horkoa, eta hangoa erran zietela Izquierda – Ezkerrakoei. Aldiz, oharrak ez du Izquierda – Ezkerrakoen erantzun bakar bat ere jasotzen; hitz erdirik ez. Ematen baitu bilera hartan Izquierda – Ezkerrakoak mutu egon zirela, eta ELAkoak, aldiz, pareta baten kontra hizketan.

Eta halaxe gaude oraindik ere. Abenduaren 22 arte dugu De Simonen eta Nuinen bihotz gogorrak biguntzeko. Ea baten bati bertze zer edo zer bururatzen zaion. Animo!


[Euskalerria Irratiko Metropoli Forala saiorako ‘Minutu bateko manifestua’, 2017ko abenduaren 19koa] bannerra-EHI

Izquierda – (ejem) Ezkerra

“I-Ek, gainera, harrotasunez hartzen du rol hori, herritarrei erakutsi nahian bera dela aldaketaren gobernuari euskararen esparruan –identitarenean, diote haiek– mugak jartzen dizkion indarra”. Halako esaldia idatzi zuen aurrekoan Xabier Letona Argiako kazetariak Izquierda – (ejem) Ezkerra koalizioak euskararekiko duen jokabidearen inguruko artikuluan. Nik zuzenketa txiki bat eginen nioke, eta “harrotasuna” jartzen duen tokian “harrokeria” paratu.

Gogoan izanen baituzue, noski, Angel Acebes Espainiako Barne ministroak bota zuen astakeriarik handiena Euskaldunon Egunkaria itxi zutelarik: euskarazko egunkari bakarra ixtea euskararen eta euskal kulturaren aldeko ekintza zela.

Bada, Izquierda – (ejem) Ezkerraren harrokeriak Acebesen harropuzkeria dakarkit gogora niri. Atzo, adibidez, enegarren aldiz.

Orreaga Fundazioak Izquierda – (ejem) Ezkerrari Leringo kondea saria eskaini izanak koalizio ezkertiar espainolistari azkura eman dio, antza, eta atzo mezu bat zabaldu zuen Twitterren, gaztelania hutsez noski, erraten zuena azken hamarkadetan  (!!) beraiek inork baino proposamen gehiago aurkeztu dituztela Euskararen Legea zabaltze aldera.

Bada, hala izanen da. Ziurrenik, beraiek izanen dira indarrean dagoen Euskararen Lege murriztailea errotik alda ez dadin aldaketa kosmetiko gehien proposatu dituztenak. Horretan zalantzarik ez.

Eta bide horretan, erabat koherentea da zerrenda bakarraren kontura eginen duten zerrikeria. Pertsona zehatz batzuen eskubide sozialak urratzen segituko dute. Eskubide sozialen defentsarekin paparra lehertzeraino betetzen zaien hauei behin eta berriz erran behar baitzaie Irakaskuntzako irakasleak hautatzeko probetan zerrenda bakarra ez ezartzeak pertsona jakin batzuen eskubide sozialak urratzen dituela, bigarren mailako herritarrak balira bezala tratatzen dituela, izurria balute bezala baztertzen dituela.

Eta barkatuko didazu, irakurle, gaurko purrustada hau, baina Izquierda – (ejem) Ezkerra egitera doana oso-oso larria da.


[Euskalerria Irratiko Metropoli Forala saiorako ‘Minutu bateko manifestua’, 2017ko abenduaren 5ekoa] bannerra-EHI

Featuring WPMU Bloglist Widget by YD WordPress Developer