Etiketa: Ciudadanos

Kaka zaharra

Duela hilabete, alai antzean agertzen ginen hemen, Nafarroako fatxek lau alderdi izanen baitzituzten aukeran maiatzeko foru eta udal hauteskundeetan eta, beraz, haien boto asko eta asko zakarrontzira joanen zirelako. Baina nola aldatzen diren gauzak, kamarada! Azken orduetan, UPNk akordioa lotu du PP eta Ciudadanos alderdiekin eta Navarra suma izenarekin aurkeztuko dira hirurak hauteskundeetara.

Anitzetan errana dut hiru laurdeneko analista naizela eta, hartara, ez espero niregandik azterketa sakon eta burutsu bat. Nire analisiak tripetatik ateratzen dira maiz eta gaurkoan nire tripetan katu guztiak dantzan ditut. Beldur naiz.

Zuek ongi gogoratzen duzue zer zen UPNren bota autoritario eta baztertzailearen azpian bizitzea? Nik bai. Kaka zaharra zen. Holaxe, labur-labur eta sinple erranda.

Eta kaka zahar haren alde, hau da, UPN, PP eta Ciudadanosen alde, 2015eko hauteskundeetan 115.977 nafar eskuindar espainolista lerratu ziren. Eta horiek guziek berriz ere emanen dute botoa kaka zaharraren alde. Ez dute boto bakar ere galduko.

Aldiz, bertze aldean, kaka berritzearen aldekoen artean, oso ziurra da ez dituztela berriz 2015eko 160.352 botoak berreskuratuko. Izan ere, “Aldaketa” deitu dugun hori kaka izan da, ez ditu gauza asko aldatu edo berandu aldatu ditu, edo %100era ailegatu beharrean %78an gelditu da, eta bla, bla, bla… Bai, bai. Aldaketa kaka izan da eta nik, gutiziak bakarrik jaten dituen gourmet honek, nolatan emanen diot botoa kaka bati?

Bada, kaka nahi ez badugu, kaka zahar, autoritario eta baztertzailea datorkigulako gainera.

Zuk aukeratu.


[Euskalerria Irratiko Metropoli Forala saiorako ‘Minutu bateko manifestua’, 2019ko martxoaren 12koa] bannerra-EHI

 

 

 

Nor baino nor fatxagoa

Iragan igandean fatxa ugari bildu zen Madrilen Espainiako banderarik handiena duen plazara. Berdin dio zenbat fatxa izan ziren zehazki, manifestazioa deitzearekin bakarrik lortu baitzuten haien lehenbiziko helburu praktikoa: Kataluniako independentistekin elkarrizketa izateko asmo ñimiñoena ere zapuztea, alegia.

Fatxa nahiko hitz lausoa da gurean. Jatorrian ‘faxista’ hitz ustez zehatzagoaren laburdura da. Baina erabilera anitzez zabalagoa du. Erranen nuke Espainiaren alde sutsuki eta itsuki egiten duten guztiei deitzen diegula fatxa, izan faxista ala ez. Eta talde zabal horretan sartzen dira igandeko manifestazioan egon ziren denak, baita UPN ere.

UPN fatxa horien guztien manifestazioan egon baitzen, harro-harro, jende gutxirekin baina lehen lerroan, “Espainiaren batasunaren alde”, “Espainia herri handia dela sinesten duten guztien arteko akordioaren alde”. UPN sartua baitago inor baino fatxago agertzeko lasterketa sutsu eta itsu horretan.

Eta, zera, gaizki ez. Nafarroako fatxek lau alderdi izanen dituzte aukeran heldu diren foru eta udal hauteskundeetan. Erran nahi baita aurreko hauteskundeetan hiru alderdi aukeran izanda bat Parlamentutik at gelditu bazen, agian oraingoan lau alderdi aukeran izanda bi kanpoan geldituko dira bidean milaka eta milaka boto zakarrontzira botaz. Nork daki. Amets egitea libre. Dena dela, zuek, fatxen aurkakook, badaezpada ere, ez utzi kaleak betetzeari eta zuengandik hurbilen dagoen alderdia bozkatzeari. Ez despistatu, gero!


[Euskalerria Irratiko Metropoli Forala saiorako ‘Minutu bateko manifestua’, 2019ko otsailaren 12koa] bannerra-EHI

Txiripa

Duela hiru urteko foru hauteskundeetan, Ciudadanos alderdi espainolistak ez zuen lortu Nafarroako Parlamentuan sartzea. 200 boto falta omen izan zitzaizkion. 200 boto gehiago boto guztien %3ra ailegatzeko eta, beraz, eserleku bat erdiesteko.

Horregatik erraten da behin eta berriz txiripaz daukagula Nafarroa Garaian Uxue Barkos lehendakari. Txiripa bat izan zela Ciudadanosen lortu gabeko parlamentari horrek balantza Erregimen zaharraren aldekoengana ez eramatea.

Bada, hasieratik, nik ez dut bat egin txiriparen teoria horrekin. Ez zait sobera gustatu. Bi arrazoirengatik.

Batetik, kontu matematiko batengatik. Hauteskundeetan, alderdiek hautetsiak lortzen dituzte proportzio sistema baten arabera. Lehenik, kontuan hartu behar da zer proportzio duen alderdi baten emaitzak emandako boto kopuru totalaren arabera. Eta gero kontuan hartu behar da alderdi bakoitzaren emaitza bertze alderdien emaitzen arabera. Alegia, Ciudadanos boto guztien %3ra iristeko ez zen nahikoa 200 boto gehiago lortzea, baizik eta gainera beharrezkoa zen bertze alderdi guztiak haien proportzioen arabera ez igotzea.

Eta bigarrenik, ez dut txiriparen teoria gehiegi gustuko ezkortasunera garamatzalako, aditzera ematen duelako 2015eko maiatzean gertaturikoa ez dela berriz errepikatuko.

Eta, aizue, ez. Edo bai, bai. Posible da 2019an ere Aldaketaren indarrek 26 parlamentari lortzea. Edo 27, ze arraio! Baina horretarako beharrezkoa da sinestea aldaketa instituzionala gertatu zela aldaketa soziala gertatu zelako aurretik, eta aldaketa sozial hori osatzen duten herritar guztiak berriz mobilizatu behar ditugula Erregimen zaharraren estamentu guztiei aurre egiten segitzeko.

Aldaketaren gobernuari egurra eman behar zaio. Nola ez. Gaizki egiten dituen gauzengatik, eta ongi egiten ez dituenengatik. Baina, aldi berean, hauspoa ematen segitu behar dugu, gauza jakina baita anitzez errazagoa dela ondoan dugun laguna konbentzitzea aurrean dugun etsaia konbentzitzea baino.

Animo!

 


[Euskalerria Irratiko Metropoli Forala saiorako ‘Minutu bateko manifestua’, 2018ko ekainaren 12koa] bannerra-EHI

Featuring WPMU Bloglist Widget by YD WordPress Developer