Monthly Archives: abendua 2012

Egutegia

by Anjel Lertxundi | 8 Comments

Urte zahar egunaren atzetik, urtats, urte berriaren lehena. Egun bat eta bestea berdinak dira, hogeita lau ordukoak dira biak. Oso ondo bereizten ditugu, ordea, esanahiak baitituzte diferente. Bat egutegi zaharrean dago, eta iraganaren sinboloa da: laster zakarrontzian egongo da. Bestearekin egutegi berria estreinatuko dugu. Eta etorkizunari begiratuko diogu bertako leihotik: egutegi berriaren aurrean zutunik, urte hobeago bat izateko esperantza ere berrituko dugu.

Gure eguneroko bizitzaren horma nagusian egongo da egutegia, gure egitekoen akuilu izan dadin, ahalik eta lorpen gehienen lekuko. Baina itxaropentsuenek bezala dakite etsienek ere zein zaila datorren etorkizunaren kudeaketa. Zaila izango da datorren urtea. Zaila hurrengoa ere. Bagenekiena gogorarazi digu Lehendakariak bere lehendabiziko ekitaldi publikoan.

Bitxia da: urtea oso joan zaigu beltz; eta, hala ere, izua eragiten du egutegia aldatzeak.

Mezua

by Anjel Lertxundi | 6 Comments

Kazetari-sen pittin bat duen orok aise erreparatzen dio mezuak informatiboki duen indarrari. Uka ezinak ditu interes soziala, politikoa eta kulturala. Baita ekonomikoa ere: hedabide guztiak egon ohi dira berria emateko amorratzen, begi-bistakoa baita albisteak ekartzen duen audientzia: inkesta guztiek azpimarratzen dute zer nolako begirunea diogun bai mezuaren emaileari bai mezuari berari.

Horregatik, kostatu egiten zaigu ulertzea Erregearen mezua Euskal Telebistan emateak sortu duen iskanbila. Ez ditugu Estatuko telebistak ikusten. Ez ditugu hedabideek, politikariek, enpresariek eta gotzainek emandako mezuari buruzko iritziak entzuteko aukerarik. Baztertuta gauzkate eta ez ginen euskaldunok bakarrik geldituko mezua ezagutzeko aukerarik gabe. Bada, eskerrak Euskal Telebistak mezua emateko adorea erakutsi duen

Mundua altuan

by Anjel Lertxundi | 1 Comment

Mundua altuan dago, gu baino gorago, guri goitik begira pantaila plasmadunetik. Krisia ari du enegarren aldiz. Protestak eta huelgak, pobreziaren tasak. Jendearen aurpegi serioak, egiten ari direna alferrikakoa dela dakitenen oihu desesperatuak eginez. Zergek gora egin dutela eta soldatek behera. Adeitsua izan nahi lukeen aurpegi bat agertu da segidan: berengatik ez balitz hondoa jo genuela, horixe izan da urteak eman duenaz egin duen laburpena. Aurpegi ozpindu bat agertu da hurrena, eta gerra baten bezperan bageunde bezalako kopeta beltz batez jardun du Kataluniak hartu duen bidearen itsuaz. Loterian zenbat jokatu dugun ere esan dute. Konexioa egin dute Eibarrekin, azken minutuko berdinketako golaren berri ematez.

Erronda ordaindu eta, munduaren tamala atzean utzirik, hurrengo tabernara abiatu gara, etsipen osoarekin han ere mundua ariko zaigula gu baino gorago, guri goitik begira pantaila plasmadunetik.

Autotik dei

by Anjel Lertxundi | 1 Comment

Teknologia berriek ohiturak ere berri. Ordenagailuei edo zernahitarako telefonoei esker, eguneroko jardun asko aldatzen ari da gure ohiko bizitzan. Hona bat. Demagun adiskide batek jo dizula telefonoz. Hitz gutxikoa da, zehatz zorrotza, esan beharrekoak di-da batean berdindu zale horietakoa. Gaur, ordea, kalaka betean ari zaizu, erlojuan kabitzen den denbora guztiaren jabe den baten gibelaz. Zurruterako goiztxo, harrituta zauzka lagunaren jarioak, ohartu zaren arte autotik deitu dizula.

Bidaia luzeren bat izango du, aspertuta egongo da. Eta zuri tokatu zaizu haren asperra arintzea. Baina zu urduri zaude, esku artean daukazun lanaren zain dago ugazaba, komunetik ere pasatu nahiko zenuke.

Lagunaren jarioak ez du, ordea, etenik. Eta zuk ez duzu deia mozteko barrurik. Nola ba! Etxera bueltan, autoan zoazela, amari deituko diozu aspaldiko partez, eta, kalakari kalaka, asteburuan bisitatxo bat egin beharrik ez.